لاہور: کاؤنٹرٹیررازم ڈیپارٹمنٹ (سی ٹی ڈی) نے ڈی جی خان میں کارروائی کرتے ہوئے کالعدم تنظیم کے 2 دہشت گردوں کو گرفتار کرلیا۔
تفصیلات کے مطابق صوبہ پنجاب کے شہر ڈیرہ غازی خان میں سی ٹی ڈی نے بڑی کارروائی کرتے ہوئے 2 دہشت گردوں کو گرفتار کر کے بارودی مواد، اسلحہ اور دیگر سامان برآمد کرلیا۔
ترجمان سی ٹی ڈی نے بتایا کہ دہشت گردوں کا تعلق کالعدم تنظیم داعش سے ہے، دہشت گردوں کا ہدف ڈی جی خان میں قانون نافذ کرنے والے ادارے تھے۔
اس سے قبل گزشتہ روز پاک فوج کے شعبہ تعلقات عامہ آئی ایس پی آر کے مطابق شمالی وزیرستان کے علاقے دوسالی، خیسورہ میں خفیہ اطلاع پر آپریشن کے دوران فائرنگ کے تبادلے میں 9 دہشت گرد مارے گئے تھے جبکہ ایک دہشت گرد کو گرفتار کر لیا گیا تھا۔
سی ٹی ڈی کی فیصل آباد میں کارروائی، 3 دہشت گرد گرفتار
یاد رہے کہ رواں سال 3 فروری کو صوبہ پنجاب کے شہر فیصل آباد میں سی ٹی ڈی نے بڑی کارروائی کرتے ہوئے 3 مبینہ دہشت گردوں کو گرفتار کر کے سیفٹی فیوزز، 3ڈیٹو نیٹرز ، اسلحہ اور دیگر سامان برآمد کیا تھا۔
ترجمان سی ٹی ڈی کا کہنا تھا کہ دہشت گردوں عبداالسلام،مائودود چشتی، علی خان کا تعلق کلعدم تنظیم سے ہے، دہشت گردوں نے حساس اداروں کو نشانہ بنانے کی منصوبہ بندی کر رکھی تھی۔
