اسلام آباد: وفاقی وزیر مذہبی امور پیر نورالحق قادری کا کہنا ہے کہ ہماری کرنسی کی صورت حال ایسی نہیں ہے ہم حج سستا کر سکیں۔
تفصیلات کے مطابق وفاقی وزیر پیر نورالحق قادری نے کہا کہ میں نے وزیر اعظم عمران خان کے کہنے پر یہ وزارت قبول کی، حجاج کی خدمت بہت بڑی سعادت ہے۔
وفاقی وزیر نے کہا کہ ہماری کرنسی کی صورت حال ایسی نہیں ہے ہم حج سستا کر سکیں، پیکج میں اضافے کی وجہ سعودی عرب میں مزید ٹیکس لگنا ہے۔ انہوں نے کہا کہ حج پالیسی جلد تیار کر کے اعلان کرنے کی کوشش کر رہے ہیں۔
پیر نورالحق قادری نے کہا کہ حجاج کی خدمت بہت بڑی سعادت ہے، تنقید ہوتی ہے کرتارپور راہداری کھول دی ،حج مہنگا کر دیا، کرتار پور اور حج کا موازنہ کیسے کیا جاسکتا ہے؟
وفاقی وزیر مذہبی امور نے مزید کہا کہ تنقید کرنے والے حقائق کو نہیں دیکھتے، کرتار پور لوگ تانگے پر آ جاسکتے ہیں، حج پر ایسی سہولت نہیں ہے۔
علی زیدی کا حج اور عمرے کے لیے بحری جہاز چلانے کا عندیہ
یاد رہے کہ گزشتہ ماہ وفاقی وزیر برائے بحری امور علی زیدی کا کہنا تھا کہ مسافر بحری جہاز چلانا چاہتے ہیں، حج اور عمرے کے لیے سمندری سفر سے اخراجات میں کمی آئے گی۔
