نیشنل سائبر کرائم ایجنسی، حساس ادارے اور رینجرز نے کارروائی کرتے ہوئے موبائل ایپ اسکیموں سے لوٹ مار کرنے والے 17 ملزمان کو گرفتار کرلیا۔
نیشنل سائبر کرائم ایجنسی، حساس ادارے اور رینجرز نے کراچی کے علاقے گلشن اقبال اسکاؤٹ کالونی میں کامیاب کارروائی کرتے ہوئے بین الاقوامی آن لائن مالیاتی فراڈ میں گروہ کے 17 افراد کو گرفتار کرلیا۔
ملزمان کے قبضے سے جعلی کویتی پولیس یونیفارم، دستاویزات اور ڈیجیٹل آلات برآمد کرلیے گئے ہیں۔
حکام کے مطابق ملزمان جعلی موبائل ایپ اور انعامی اسکیموں سے شہریوں کو لوٹتے تھے، مرکزی ملزم عبدالغفار جو نیٹ ورک کا سرغنہ ہے وہ فرار ہوگیا ہے۔
ملزمان زیادہ تر خلیجی ممالک کے شہریوں کو ٹارگٹ کرتے تھے اور کارروائی میں ڈیجیٹل آلات کا استعمال کرتے تھے۔
حکام کا کہنا ہے کہ کویتی پولیس کی وردی اور وزارت داخلہ کویت کی جعلی مہر کے ذریعے شہریوں کے ساتھ فراڈ کرتے تھے، ملزم غیر ملکی حکام بن کر دھمکیاں بھی دیتے تھے۔
گزشتہ کئی ماہ سے ملزمان کی جانب سے کارروائیاں جاری تھیں جس کی شکایت خلیجی ملک کی جانب سے موصول ہورہی تھیں۔
نیشنل سائبر کرائم ایجنسی حکام کے مطابق گرفتاری کے بعد ملزمان سے معلومات جاری ہیں کہ کتنی رقم ٹرانسفر کی گئی اور کتنے لوگوں کا ڈیٹا چرایا گیا ہے۔
