کراچی : محکمہ موسمیات نے سندھ میں ہونے والی بارش کے اعداد وشمار جاری کردئیے، 6گھنٹے کے دوران طوفان بیپرجوئے شمال مشرق کی طرف بڑھ چکا ہے اور کل تک اس کی شدت میں مزید کمی آجائے گی۔
محکمہ موسمیات کے مطابق سمندری طوفان بیپرجوئے کی شدت میں بتدریج کمی سامنے آرہی ہے، گزشتہ 6گھنٹوں کے دوران طوفان بیپرجوئے شمال مشرق کی طرف بڑھ چکا ہے۔
موسم کا حال بتانے والوں کا کہنا ہے کہ سمندری طوفان بدین کے مشرق سے170کلومیٹر دور ہوگیا، اور کیٹی بندر کے مشرق سے 300 کلومیٹر دور ہونے لگا ہے۔
سمندری طوفان ٹھٹھہ کے مشرق سے 265 کلومیٹر کے فاصلے پر پہنچ گیا، طوفان کے گرد ہوائیں 60،70کلومیٹر فی گھنٹہ کی رفتارسے چل رہی ہے، سمندری لہروں کی اونچائی کمی کے بعد 8سے10 فٹ تک ہے۔
محکمہ موسمیات کا کہنا ہے کہ آدھی رات کو ڈپریشن میں مزید کمزور ہونے کا امکان ہے، کل تک سمندری طوفان بیپر جوئے مزید کمزور ہوجائے گا۔
علاوہ ازیں محکمہ موسمیات نے آج بروز جمعہ سندھ میں ہونے والی بارش کے اعداد وشمارجاری کردئیے جس کے مطابق ٹھٹھہ میں بارش 5.0ملی میٹر، بدین میں 21.0ملی میٹر ریکارڈ کی گئی۔
اس کے علاوہ حیدرآباد ائیرپورٹ پر4.0 ملی میٹر، حیدرآباد شہر میں بارش 10.0 ملی میٹر، ٹنڈوجام میں 1.0 ،میرپور خاص میں 4.0 ملی میٹر بارش ریکارڈ، مٹھی میں بارش 136.0ملی میٹر ریکارڈ کی گئی۔
