ڈی آئی خان : ڈیرہ اسماعیل خان میں ٹارگٹ کلنگ کے تازہ واقعات میں سی ٹی ڈی کے ڈی ایس پی اورایک پولیس اہلکار سمیت تین افراد نامعلوم افراد کی فائرنگ کا نشانہ بن گئے ہیں۔
ڈیرہ اسماعیل خان شہر کے علاقہ خیرآباد کالونی میں سی ٹی ڈی کے ڈی ایس پی نو رمحمد مروت کو جمعرات کی شام اس وقت فائرنگ کا نشانہ بنایا گیا جب وہ مسجد میں نماز مغرب ادا کر کے گھر واپس جا رہے تھے۔
پولیس کے مطابق چار نامعلوم مسلح موٹر سائیکل سواروں نے انہیں فائرنگ کا نشانہ بنایا جس میں وہ شدید زخمی ہو گئے، جنہیں فوری طور پر ڈسٹرکٹ ہیڈ کوارٹر اسپتال منتقل کر دیا گیا جہاں وہ زخموں کی تاب نہ لاتے ہوئے چل بسے۔
ایک اور واقعہ میں مدینہ کالونی میں نامعلوم دہشت گردوں کی فائرنگ سے ایف آر پی کانسٹیبل شاہ زیب محسود جاں بحق ہوگیا۔ جبکہ ایک اور واقعہ میں ڈیرہ شہری کے گنجان آباد کمشنری بازار میں نامعلوم مسلح موٹر سائیکل سواروں کی فائرنگ سے ندیم نامی تاجرجاں بحق ہو گیا۔
ان واقعات کے بعد مسلح ملزمان موقع سے فرار ہونے میں کامیاب ہوگئے۔ ان واقعات کے بعد علاقے میں پولیس کو ہائی الرٹ کردیا گیا ہے۔ شہر میں ایک پولیس افسرا اور اہلکارکے قتل کے واقعہ کے بعد خوف وہراس کی لہر دوڑ گئی ہے۔
