لاہور: پنجاب کے دارالحکومت میں ڈکیت سرگرم ہوگے، 24گھنٹوں میں چوری اور ڈکیتی کی مختلف وارداتوں میں شہری ایک کروڑ نقدی اور قیمتی اشیاء سے محروم ہوگئے۔
تفصیلات کے مطابق لاہور کے علاقے ہربنس پورہ میں 2ڈاکو شہری سے 40ہزار روپے لوٹ کر فرار ہوئے، جبکہ برکی میں ڈاکو شہری سے 3لاکھ45ہزار کی نقد ی اور زیورات لے اڑے۔
نشترکالونی میں ڈاکو فیملی کو یرغمال بنا کر 3لاکھ15ہزار روپے لوٹ کر فرار ہوگئے۔
اسی طرح لاہور کے علاقے ہڈیارہ میں ڈاکوگھر سے 2لاکھ70ہزار کی نقدی لے اڑے، شالیمار میں ڈاکو گھر سے 2لاکھ40 ہزار کی نقدی اور زیورات لوٹ کر لے گئے۔ اسلام پورہ میں ڈاکو گھر والوں کو یرغمال بناکر ایک لاکھ 95ہزار روپے اور موبائل فون لے کر رفوچکر ہوگئے۔
نواں کوٹ میں ملزمان گھر سے ایک لاکھ40ہزار روپے اور موبائل فون لے اڑے۔ سبزہ زار، سرورروڈ اور لٹن روڈ سے گاڑیاں چوری ہوئیں، لاہور کے مختلف علاقوں سے متعدد موٹر سائیکلیں بھی غائب ہوئیں۔
