گھوٹکی: سلام گوٹھ پولیس چوکی پر ایک درجن سے زائد ڈاکوؤں کے حملے میں 2 اہلکار شہید اور ایک زخمی ہوگیا۔
تفصیلات کے مطابق گھوٹکی کے تھانہ گیمڑو کی حدود میں سحری کی وقت اسلام گوٹھ پولیس چوکی پر ڈاکوؤں نے حملہ کردیا ،جس کے نتیجے میں پولیس کے دو جوان پنو عاقل کا رہائشی علی گوہر دایو اور رتوڈیرو کا رہائشی کشور کمار جاں بحق ہوئے جبکہ ایک اہلکار عزیز میرانی زخمی ہوگیا۔
ڈی آئی جی جاوید جسکانی نے بتایا کہ پولیس چوکی پر ایک درجن سے زائد ڈاکوؤں نے حملہ کیا، پولیس چوکی پر حملے کے بعد ڈاکو کچے کی طرف فرار ہوگئے۔
ڈی آئی جی سکھر جاوید جسکانی نے واقعے کی تصدیق کرتے ہوئے بتایا کہ افسوسناک واقعے کے بعد پولیس کی بھاری نفری ڈاکوؤں کا تعاقب کر رہی ہے۔
دوسری جانب شہید اہلکاروں کی لاشیں اور زخمی اہلکار کو گھوٹکی ہسپتال منتقل کیا گیا ہے جہاں سے زخمی اہلکار کو سکھر سول ہسپتال کے لیئے ریفر کیا گیا ہے۔
