دادو : پی ایس 86میں ضمنی الیکشن میں پیپلز پارٹی کے امیدوار سید صالح شاہ نے برتری حاصل کرلی جبکہ تحریک انصاف کے امیدوار امداد خان لغاری دوسر ے نمبر پر رہے۔
پی ایس86ضمنی الیکشن کے تمام پولنگ اسٹیشنز کے غیرحتمی اور غیرسرکاری نتائج کے مطابق پیپلز پارٹی کے امیدوار سید صالح شاہ نے 42ہزار 254ووٹ لے کر کامیابی حاصل کرلی جبکہ تحریک انصاف کے امیدوار امداد خان لغاری 25ہزار 555لیکر دوسر ے نمبر پر رہے۔
پیپلزپارٹی کے امیدوار کی کامیابی پر چیئرمین بلاول بھٹو زرداری نے سید صالح شاہ کو مبارکباد دی ہے، انہوں نے اپنے بیان میں کہا کہ پی ایس86میں پیپلزپارٹی کی جیت عوام کے اعتماد کا مظہر ہے، سازشوں کے باوجود عوام نے اپنا مینڈیٹ چوری نہیں ہونے دیا۔
اس کے علاوہ پی پی رہنما سعیدغنی نے بھی پی ایس86کےانتخابات میں کامیابی پر پی پی امیدوار کو مبارکباد دی ہے، ان کا کہنا ہے کہ سندھ کی عوام نےثابت کردیا کہ وہ صرف پیپلزپارٹی کےساتھ ہیں، لاڑکانہ کےانتخابات میں دھاندلی کے تحفظات اب یقین میں بدل گئے ہیں۔
واضح رہے کہ ) پی ایس 86کے 158 پولنگ اسٹیشنوں پر پولنگ صبح آٹھ بجے شروع ہوئی جو بغیر کسی وقفے کے شام پانچ بجے تک جاری رہی۔
کسی بھی ناخوشگوار واقعے سے نمٹنے کیلئے فوج اور رینجرز کے 1100 اور پولیس کے 1300 اہلکاروں کو تعینات کیا گیا تھا۔
پاک فوج اور رینجرز کے اہلکار پولنگ اسٹیشن کے اندر اور باہر تعینات رہے۔ ضلعی انتظامیہ کی ہدایت پر دادو بھر میں عام تعطیل رہی۔
