ہرات: افغانستان نے پانی کا مسئلہ حل کرنے کے لیے ایک بڑا قدم اٹھا لیا ہے، اور مغربی صوبے ہرات میں پانی کی فراہمی کے ایک بڑے منصوبے پر کام شروع کر دیا۔
تفصیلات کے مطابق افغانستان کے صوبے ہرات میں پانی کی فراہمی کے ایک منصوبے کا آغاز ہو گیا، مقامی میڈیا ادارے سلام وطن دار نے پیر کے روز بتایا کہ پانی کے منصوبے کا آغاز اتوار کو ہوا، جس پر 9 کروڑ 10 لاکھ افغانی (10 لاکھ 30 ہزار امریکی ڈالرز) لاگت آئی ہے۔
رپورٹ کے مطابق اس منصوبے سے 2 ہزار 500 گھروں کو پانی فراہم کیا جائے گا، بلدیہ ہرات رواں سال مزید عوامی منصوبے بھی شروع کرنے کا ارادہ رکھتی ہے۔
واضح رہے کہ ہرات صوبے میں پشدان ڈیم کی تعمیر اگست میں پچھلی حکومت کے خاتمے کے بعد سے رک گئی ہے، جس سے اس منصوبے کا مستقبل ہوا میں معلق ہو گیا ہے۔
پشدان ڈیم، افغانستان کے سب سے بڑے بنیادی انفرا اسٹرکچر کے منصوبوں میں سے ایک، ہرات شہر کے مشرق میں 25 کلومیٹر دور کرخ ضلع میں واقع ہے۔
اس ہائیڈرو الیکٹرک ڈیم کو 2021 کے آخر تک مکمل کیا جانا تھا، تاہم، اس منصوبے پر کام روک دیا گیا ہے، اور ڈیم صرف 85 فی صد ہی مکمل ہوا ہے۔
ڈیم حکام کے مطابق، آبی ذخائر کی دیوار، پانی کی نہروں اور پاور ٹربائنز لگانے کے لیے جگہوں پر کام مکمل ہو چکا ہے اور ڈیم پانی لینے کے لیے تیار ہے۔
