دمشق: شام میں بھی اسرائیلی فورسز کی درندگی جاری ہے، دمشق پر اسرائیلی حملوں میں 3 شہری جاں بحق اور 9 زخمی ہو گئے۔
غیر ملکی میڈیا رپورٹس کے مطابق شامی دارالحکومت دمشق پر اسرائیلی حملے میں ایک خاتون براڈ کاسٹر سمیت تین شہری جاں بحق ہو گئے ہیں۔
شام میں ریڈیو اور ٹیلی وژن کی جنرل کارپوریشن نے کہا ہے کہ دمشق کے خلاف اسرائیلی جارحیت کے نتیجے میں براڈ کاسٹر صفا احمد شہید ہو گئی ہیں، شامی وزرات دفاع کا کہنا ہے کہ اسرائیل نے طیاروں اور ڈرون کے ذریعے دمشق کو نشانہ بنایا۔
وزارت دفاع کے مطابق فوجی دفاعی نظام نے کئی اسرائیلی میزائلوں اور ڈرونز کو فضا میں ہی تباہ کر دیا۔
شام کی عرب خبر رساں ایجنسی ثنا نے قبل ازیں اطلاع دی تھی کہ اس کی ٹیلی وژن اینکر صفا احمد منگل کے روز شام کے دارالحکومت کو نشانہ بنانے والی اسرائیلی جارحیت میں ماری گئی۔
اسرائیلی فضائی حملے میں فلسطینی صحافی بچوں اور شوہر سمیت شہید
اسرائیل کی وزارت دفاع اور فوج نے فوری طور پر اس حوالے سے کوئی بیان جاری نہیں کیا ہے، تاہم اسرائیلی وزیر اعظم نیتن یاہو کی ڈھٹائی برقرار ہے، انھوں نے کہا کہ مشرق وسطیٰ کا کوئی گوشہ ہماری دسترس سے دور نہیں ہے۔
