مکیش امبانی کے چھوٹے بیٹی کی شادی کی تقریبات میں تینوں خانز کے ایک ساتھ رقص کے بعد شاہ رخ کی پرانی ویڈیو وائرل ہوگئی۔
شاہ رخ خان کو بالی وڈ کا بادشاہ کہا جاتا ہے جبکہ وہ حاضر جوابی میں بھی اپنا ثانی نہیں رکھتے۔ تاہم ماضی میں ان کی جانب سے بھارتی صحافی کو دیا گیا جواب اب ان کے لیے تنقید کا باعث بن رہا ہے اور لوگ اسے اننت امبانی کی شادی سے جوڑ رہے ہیں۔
ماضی میں ایک تقریب کے دوران شاہ رخ خان سے صحافی نے سوال کیا تھا کہ کیا وہ کبھی تینوں خانز سلمان، عامر اور شاہ رخ کو ایک ساتھ کسی فلم میں دیکھ سکیں گے۔
اس کے جواب میں کنگ خان کا مسکراتے ہوئے کہنا تھا کہ اگر آپ افورڈ کرسکیں تو آفر کردیں اور تینوں خانز کو سائن کرلیں جبکہ ساتھ ہی انھوں نے لقمہ دیا کہ بیٹا چڈی بنیان بک جائے گی۔
ایشیا کے امیر ترین لوگوں میں شامل بھارتی بزنس ٹائیکون مکیش امبانی کے بیٹے کی شادی سے پہلے کی تقریبات میں بالی ووڈ کے تینوں خانز کے ایک ساتھ رقص کرنے کے بعد شاہ رخ کی یہ ویڈیو سوشل میڈیا پر وائرل ہوگئی۔
صارفین اس ویڈیو کو مختلف کیپشن کے ساتھ لگا رہے ہیں، اکثر لوگوں کا کہنا ہے کہ امبانی ہی ایساکرسکتے ہیں اور انھوں نے تینوں خانز کو اپنے پیسے کے بل بوتے پر یکجا کردیا۔
واضح رہے کہ جام نگر میں مکیش امبانی کے بیٹے اننت امبانی اور رادھیکا مرچنٹ کی شادی سے پہلے کی تقریبات منعقد ہوئی تھی جہاں دنیا بھر سے مختلف نامور شخصیات سمیت بالی ووڈ کے اسٹارز اور کھلاڑی شریک ہوئے تھے۔
اننت امبانی کی شادی سے پہلے کی تقریبات میں بالی ووڈ کے تین بڑے نام شاہ رخ خان، سلمان خان اور عامر خان نے ایک ساتھ رقص کیا تھا تو حاضرین بھی جھوم اٹھے۔
انسٹاگرام اور ایکس پر وائرل ہونے والی ویڈیوز میں شاہ رخ خان، سلمان خان نے سیاہ کُرتا پہنا ہوا تھا جبکہ عامر خان نے ہرے رنگ کا کرتا پاجامہ زیب تن کرکے اپنی فلموں کے گانے پر ڈانس کیا تھا۔
