جنیوا : وزیرخزانہ اسحاق ڈار نے جینوا میں آئی ایم ایف مشن چیف سے ملاقات میں قرض پروگرام پر عملدرآمد کے عزم کو دہرایا۔
تفصیلات کے مطابق جنیوا میں وزیرخزانہ اسحاق ڈار کی آئی ایم ایف مشن چیف ناتھن پورٹرسے ملاقات ہوئی۔
ملاقات میں پاکستان کو درپیش معاشی چیلنجوں پرتبادلہ خیال کیا گیا اور وزیرخزانہ نے قرض پروگرام مکمل کرنے کاعزم دہرایا۔
وزارت خزانہ نے بتایا کہ اسحاق ڈار اور ناتھن پورٹرنے ماحولیاتی تبدیلیوں کے پیش نظرعلاقائی معیشتوں کو درپیش چیلنجوں پر بات کی۔
اس کے علاوہ وزیر خزانہ اسحاق ڈار نےعالمی بینک کے نائب صدر مارٹین ریزر سے بھی ملاقات کی، جس میں اسحاق ڈارنے کہا عالمی بینک کے تعاون کو قدر کی نگاہ سے دیکھتے ہیں۔
آئی ایم ایف نے مطالبہ کیا ہے کہ پاکستان کو ڈالر کا ایکسچینج ریٹ فری فولٹ کرنا ہوگا اور ایکسچینج ریٹ پر مصنوعی پابندی ختم کرنا ہوگی۔
ذرائع کے مطابق پاکستان نے اگر آئی ایم ایف کا یہ مطالبہ مان لیا تو ڈالر کا ایکسچینج ریٹ 255 روپے تک پہنچ سکتا ہے۔ اس کے علاوہ پاکستان کو رواں سال 30 جون تک پٹرولیم لیوی 855 ارب روپے جمع کرانے کا پلان بھی دینا ہوگا اور ڈیزل پر عائد لیوی بھی 32.5 روپے سے بڑھا کر فوری طور پر 50 روپے لیٹر کرنا ہوگی۔
ذرائع نے بتایا کہ آئی ایم ایف اور پاکستان ملاقات میں گیس کے شعبے میں 1500 ارب روپے کا سرکلر ڈیٹ ختم کرنے پر بھی بات ہوگی اور سرکلر ڈیٹ کم کرنے کے لیے گیس کے ریٹ مرحلہ وار بڑھانا ہوں گے۔
آئی ایم ایف ٹیکس آمدن میں 300 ارب روپے کے اضافے کا مطالبہ پہلے ہی کرچکا ہے جب کہ اب پاکستان کو بجلی کے نقصانات کم کرنے کے لیے بجلی کے ریٹ بھی بڑھانے ہوں گے کیونکہ آئی ایم ایف بجلی کا فی یونٹ ریٹ 3.5 روپے بڑھانے کا مطالبہ کرچکا ہے۔
