اسلام آباد: نائب وزیر اعظم اور وزیر خارجہ اسحاق ڈار نے چینی ہم منصب وانگ ژی سے ٹیلیفونک کیا اور انہیں موجودہ علاقائی صورتحال سے آگاہ کیا۔
اے پی پی اردو کے مطابق ترجمان دفتر خارجہ کے جاری کردہ اعلامیہ کے مطابق اسحاق ڈار نے وانگ ژی کے ساتھ رابطے میں بھارت کے یکطرفہ اور غیر قانونی اقدامات کے ساتھ ساتھ پاکستان کے خلاف بے بنیاد بھارتی پروپیگنڈے کو دوٹوک الفاظ میں مسترد کیا۔
نائب وزیر اعظم نے چین کی مسلسل اور غیر متزلزل حمایت پر اظہار تشکر کرتے ہوئے پاک چین دوستی اور ہمہ موسمی اسٹریٹجک کوآپریٹو پارٹنرشپ کے مشترکہ وژن کیلیے پاکستان کے مستحکم عزم کا اعادہ کیا۔
یہ بھی پڑھیں: بھارت کے لیے بہتر ہوگا کہ پاکستان سے کوئی پنگا نہ لے، اسحاق ڈار
اسحاق ڈار نے تمام شعبوں میں دوطرفہ تعاون کو مزید گہرا کرنے کیلیے پاکستان کے عزم پر زور دیا۔ فریقین نے علاقائی امن و استحکام کو برقرار رکھنے، باہمی احترام اور افہام و تفہیم کو فروغ دینے اور یکطرفہ اور تسلط پسندانہ پالیسیوں کی مشترکہ مخالفت کرنے کے اپنے پختہ عزم کا بھی اعادہ کیا۔
انہوں نے خطے اور اس سے باہر امن، سلامتی اور پائیدار ترقی کے اپنے مشترکہ مقاصد کے فروغ کیلیے ہر سطح پر قریبی رابطے برقرار رکھنے پر بھی اتفاق کیا۔
