دی ہیگ: یورپی یونین کے قانون نافذ کرنے والے ادارے نے ڈارک ویب کے خلاف کارروائی کر کے 150 سے زائد کارندوں کو گرفتار کرلیا۔
خبررساں ادارے کی رپورٹ کے مطابق یورپی یونین کے عالمی سطح پر قانون نافذ کرنے والے حساس ادارے نے غیرقانونی، ممنوعہ اشیا کی خرید و فروخت اور غیر اخلاقی کاموں کے حوالے سے مشہور ڈارک ویب کے خلاف عالمی سطح پر منظم آپریشن کیا۔
اس کارروائی کے دوران دنیا کے مختلف ممالک سے ڈارک ویب سے وابستہ 150 کارندوں کو گرفتار کیا گیا، جن کے قبضے سے بھاری مقدار میں غیر قانونی کرنسی، منشیات اور اسلحہ برآمد کیا گیا۔
رپورٹ کے مطابق حساس ادارے یورو پول نے امریکا، جرمنی، برطانیہ سمیت کئی ممالک میں موجود کارندوں کے خلاف سخت ایکشن لیا۔
ادارے کی رپورٹ کے مطابق امریکا سے 65، جرمنی سے 47 اور برطانیہ سے 47 کارندوں کو گرفتار کیا گیا، حراست میں لیے گیے تمام ملزمان غیر قانونی اشیا اور غیر اخلاقی کاموں کی خرید و فروخت میں ملوث تھے۔
اعلامیے کے مطابق ملزمان کے قبضے سے لاکھوں یوروز، ڈیجیٹل کرنسی، بٹ کوائن، منشیات اور اسلحہ بھی برآمد ہوا۔ بتایا گیا ہے کہ کامیاب کارروائی یوروپول کی دیگر ممالک کی انٹیلی جنس کے تعاون اور معلومات کی بنیاد پر عمل میں لائی گئی۔
