بھارتی اداکار درشن تھگودیپا کی ایما پر قتل کیے جانے والے رکشہ ڈرائیور رینوکا سوامی کی موت سے قبل کی تصاویر منظر عام پر آگئیں۔
میڈیا رپورٹ کے مطابق بنگلور میں ایک 33 سالہ رکشہ ڈرائیور رینوکا سوامی کی موت سے متعلق نئی تصاویر منظر عام پر آئی ہیں، جس میں قتل سے چند لمحے پہلے بغیر قمیض کے، خوفزدہ اور زندگی کی بھیک مانگتے ہوئے دیکھا گیا۔
ان تصاویر میں رینوکا سوامی کو بغیر قمیض کے کھڑے ٹرکوں کے پس منظر میں دیکھا جا سکتا ہے اور ان کے جسم پر زخم کا نشان بھی نظر آتا ہے۔ ایک تصویر میں وہ براہ راست کیمرے کی طرف دیکھ رہا ہے اور دوسری میں زمین پر پڑا ہوا ہے۔
واضح رہے کہ رینوکا سوامی کی لاش 9 جون کو بنگلور کے ایک فلائی اوور کے قریب پائی گئی تھی، اس لاش کے حوالے سے پولیس کا کہنا تھا کہ رکشہ ڈرائیور کو مبینہ طور پر کناڈا اداکار درشن کی ہدایت پر اغوا کے بعد قتل کیا گیا۔
رینیو نے اداکارہ پویترا گوڈا کو سوشل میڈیا پر مبینہ طور پر نازیبا پیغامات بھیجے تھے، پوسٹ مارٹم رپورٹ کے مطابق رینوکا سوامی کو ڈنڈوں سے مارا گیا اور اس کی موت شدید زخموں اور خون بہنے کی وجہ سے ہوئی۔ اسے الیکٹرک شاکس بھی دیے گئے تھے۔
