کراچی: ہیٹ ویو کے پیشِ نظر سندھ بھر میں انٹرمیڈیٹ کے امتحانات ملتوی کر دیے گئے۔
تفصیلات کے مطابق آئندہ دنوں میں ہیٹ ویو کے پیش نظر سندھ بھر میں انٹرمیڈیٹ امتحانات کی تاریخ تبدیل کی گئی ہے۔
وزیراعلیٰ سندھ سید مرادعلی شاہ نے وزیر یونیورسٹیز اینڈ بورڈ محمدعلی ملکانی کی سفارش پر امتحانات کی تاریخ تبدیل کرنے کی منظوری دی ہے۔
ترجمان وزیراعلیٰ کے مطابق انٹر کے امتحانات 22 مئی کی بجائے اب 27 مئی سے ہوں گے۔ یونیورسٹیز اینڈ بورڈ نے امتحانات کی تاریخ تبدیل کرنےکا نوٹیفکیشن جاری کر دیا ہے۔
کراچی سمیت ملک بھر میں گرمی کی شدید لہر جاری ہے محکمہ موسمیات نے پیشگوئی کی ہے کہ شہر قائد میں درجہ حرارت سے کہیں زیادہ گرمی محسوس کی جائے گی۔
محکمہ موسمیات کے مطابق شہر قائد کی ہوا میں نمی کا تناسب 68 فیصد ہے اور جنوب مغربی سمت سے 19 کلومیٹر فی گھنٹہ کی رفتار سے ہوائیں چل رہیں ہیں۔
