لندن: برطانیہ کے سابق وزیر اعظم ڈیوڈ کیمرون کا سیکیورٹی گارڈ پستول جہاز کے باتھ روم میں بھول گیا جس کی وجہ سے ہنگامی حالت نافذ ہوگئی۔
بین الاقوامی میڈیا رپورٹ کے مطابق ڈیوڈ کیمرون اپنی اہلیہ کے ساتھ برٹش ایئرویز کی پرواز سے پیر کے روز نیویارک سے لندن جارہے تھے کہ اسی دوران جہاز میں عجیب واقعہ پیش آیا۔
برطانیہ کے سابق وزیر اعظم کی سیکیورٹی کے لیے ایک افسر تعینات ہے جو میٹروپولیٹن پولیس سے تعلق رکھتا ہے۔ ہیتھرو ائیرپورٹ پر محافظ باتھ روم گیا تو وہ وہی پر پستول بھول کر آگیا۔
سیکیورٹی گارڈ سابق برطانوی وزیر اعظم کا پاسپورٹ بھی ٹوئلٹ میں چھوٹ کر آیا، پستول اور دو پاسپورٹ ایک مسافر کو باتھ روم سے ملے جس نے فوری طور پر انتظامیہ کو اطلاع دی۔
انتظامیہ نے کسی بھی ناخوشگوار واقعے سے نمٹنے کے لیے فوری طور پر ایمرجنسی نافذ کی اور کمانڈوز نے جہاز کو سیکیورٹی حصار میں لے کر سب کی تلاشی شروع کی۔
سرچنگ کی وجہ سے ہیتھرو ائیرپورٹ سے اڑنے والی پرواز تاخیر کا شکار ہوئی ، بعد ازاں گارڈ نے اعتراف کیا کہ وہ جلد بازی میں اسلحہ اور پاسپورٹ باتھ روم میں بھول آیا تھا۔ جہاز کے کپتان کے مطابق باتھ روم سے اخبارات بھی برآمد ہوئے۔
