ممبئی: آسٹریلیا نے پہلے ون ڈے میں بھارت کو ریکارڈ شکست دے کر بھارتی سورماؤں کا غرور خاک میں ملا دیا۔
ممبئی میں کھیلے گئے میچ میں مہمان ٹیم قہر بن کر ٹوٹ پڑی، شاندار کارکردگی کی بدولت میزبان ٹیم کو چاروں شانے چت کر دیا، مضبوط بھارتی بیٹنگ لائن آسٹریلوی بولنگ اٹیک کے سامنے ریت کی دیوار ثابت ہوئی اور پوری ٹیم 255 رنز پر ڈھیر ہوگئی۔
اوپنر شیکھر دھون 74 رنز کے ساتھ ٹاپ اسکورر رہے جب کہ راہول 47، پانٹ 28 اور جڈیجا 25 رنز بنا سکے، کپتان ویرات کوہلی صرف 16 رنز کے مہمان ثابت ہوئے۔
آسٹریلیا کی جانب سے مچل اسٹارک نے سب سے زیادہ 3 ، پیٹ کمنز اور ریچرڈسن نے 2،2 جب کہ زمپا اور آگر نے ایک ایک وکٹ حاصل کی۔
Records tumble as Australia crush India by 10 wickets in Mumbai. FULL REPORT & HIGHLIGHTS: https://t.co/QeB2NTcOLK #INDvAUS pic.twitter.com/f4Rb5Bcjib
— cricket.com.au (@cricketcomau) January 14, 2020
ہدف کے تعاقب میں آسٹریلوی اوپنرز نے پراعتماد انداز میں اننگز کو آگے بڑھایا، دونوں بیٹسمین نے جم کر بیٹنگ کی اور نصف سنچریاں مکمل کرنے کے بعد حارحانہ انداز اپناتے ہوئے وکٹ کے چاروں جانب دلکش اسٹروکس کھیل کر بولرز پر اپنی دھاک بٹھا دی۔
ڈیوڈ وارنر اور کپتان فنچ نے تیز رفتاری سے اسکور میں اضافہ کیا اور بلا خوف و خطر کھل کر کھیلتے رہے، دونوں بلے بازوں نے سنچریاں اسکور کیں اور مطلوبہ ہدف صرف 38 ویں اوور میں بغیر کسی وکٹ کے نقصان پر حاصل کر لیا۔
ڈیوڈ وارنر نے 128 اور فنچ نے 110 رنز کی ناقابل شکست اننگز کھیلی، تاریخ میں پہلی بار آسٹریلیا نے بھارت کو 10 وکٹوں سے ہرایا ہے جب کہ دونوں بلے بازوں کے درمیان ہونے والی 258 رنز کی شراکت داری بھارت کے خلاف کسی بھی وکٹ پر ہونے والی سب سے بڑی پارٹنرشپ ہے۔
