آسٹریلوی کرکٹر ڈیوڈ وارنر اور ان کی بیٹی نے فلم پشپا کے اداکار اللو ارجن کو انوکھے انداز میں سالگرہ کی مبارک باد دی ہے، جس کی ویڈیو سوشل میڈیا پر وائرل ہوگئی۔
تفصیلات کے مطابق آسٹریلوی کرکٹر ڈیوڈ وارنر جو تیلگو زبان میں بننے والی بھارتی فلم کے کردار پشپا سے بے حد متاثر ہیں، انہوں نے فلم پشپا کے مرکزی کردار اللو ارجن کو ان کے منفرد انداز "جھکے گا نہیں” میں مبارکباد پیش کی ہے۔
سوشل میڈیا پر وائرل ہونے والی ویڈیو میں انہوں نے اپنی بیٹی کے ہمراہ پشپا کو ان کی سالگرہ پر مبارکباد دی اور نیک خواہشات کا اظہار کیا، جسے صارفین نے بھی بہت پسند کیا۔
اپنی ویڈیو میں وارنر اور ان کی صاحبزادی اسلا کا کہنا ہے کہ "سالگرہ مبارک ہو دوست، ہم پشپا ٹو کا انتظار نہیں کر سکتے۔ ہمیں امید ہے کہ آپ کی سالگرہ بہت اچھی گزرے، "سالگرہ مبارک پشپا”۔
View this post on Instagram
آسٹریلوی کرکٹر نے گزشتہ روز یہ ویڈیو شیئر کی جسے لاکھوں کی تعداد میں مداحوں نے دیکھا اور اس پر دلچسپ تبصرے بھی کررہے ہیں۔
واضح رہے کہ اس سے قبل بھی ڈیوڈ وارنر پشپا کا روپ دھار کر دلچسپ ویڈیوز بنا چکے ہیں، ان ویڈیوز میں وہ اللو ارجن کے ڈانس مووز کرتے دکھائی دے رہے ہیں۔
وہ اس سے پہلے بھی اکثر بالی ووڈ فلموں کے مناظر پر اسی نوعیت کی ویڈیوز بنا کر شیئر کرتے رہے ہیں تاہم اب لگتا ہے کہ تیلگو فلم پشپا انہیں کچھ زیادہ ہی پسند آئی ہے۔
اد رہے کہ فلم ‘پشپا دی رائز’ کی کامیابی کے بعد ساؤتھ کے سپر اسٹار اللو ارجن کو کئی بڑی فلموں کے آفرز مل رہے ہیں جن میں سے ایک لائکا پروڈکشن ہے۔
بھارتی میڈیا کے مطابق لائکا نے اپنے اگلے پروجیکٹ کے لیے اللو ارجن سے رابطہ کیا ہے اور اس کے لیے انہیں 100 کروڑ روپے (یعنی 2 ارب 35 کروڑ روپے پاکستانی) کی پیشکش بھی کی گئی ہے۔ لائکا پروڈکشن کی اس فلم کو ایٹلی ڈائریکٹ کریں گے۔
