میلبرن: آسٹریلیا اور بھارت کے درمیان کھیلے جانے والے دوسرے ٹیسٹ سے قبل لیجنڈ آنجہانی کرکٹر ڈین جونز کو خراج عقیدت پیش کیا گیا۔
تفصیلات کے مطابق آسٹریلیا اور بھارت کے درمیان کھیلے جانے والے میلبرن ٹیسٹ سے قبل لیجنڈ کرکٹر ڈین جونز کو خراج عقیدت پیش کیا گیا، ڈین جونز ستمبر میں دل کا دورہ پڑنے کے باعث انتقال کرگئے تھے۔
لیجنڈ کرکٹر کی اہلیہ اور بیٹیوں نے گراؤنڈ میں آکر ڈین جونز کا بیٹ کیپ اور سن گلاسز وکٹ پر رکھے ، اس موقع پر سابق کرکٹر ایلن بارڈر بھی ہمراہ تھے۔
واضح رہے کہ سابق آسٹریلوی کرکٹر ڈین جونز رواں سال ستمبر میں دل کا دورہ پڑنے سے انتقال کرگئے تھے ، وہ پی ایس ایل سیزن فائیو میں کراچی کنگز کی کوچنگ کے فرائض انجام دے رہے تھے، اس سے قبل وہ اسلام آباد یونائیٹڈ سے بھی وابستہ رہے۔
میلبرن ٹیسٹ میں آسٹریلیا کی ٹیم پہلی اننگز میں 195رنز پر ڈھیر ہوگئی، جسپریت بمرا نے چار کھلاڑیوں کی پویلین کی راہ دکھائی ، روی چندر ایشون نے تین وکٹیں حاصل کیں۔
پہلے روز کھیل کے اختتام پر بھارت نے ایک وکٹ کے نقصان پر 36 رنز بنالیے ہیں، شبھ من گل 28 اور پجارا 7 رنز کے ساتھ کریز پر موجود ہیں، مچل اسٹارک نے اگروال کو صفر پر پویلین روانہ کیا۔
