آج حکیم احمد شجاع کا یومِ وفات ہے۔ وہ انشا پرداز، افسانہ نگار، شاعر اور ڈراما نویس کی حیثیت سے اردو ادب میں بڑا مقام رکھتے ہیں۔
4 جنوری 1969ء کو لاہور میں وفات پانے والے حکیم احمد شجاع کی پیدائش کا سن 1896ء ہے۔ انھوں نے لاہور سے میٹرک اور ایم اے او کالج علی گڑھ سے ایف اے کیا۔ میرٹھ کالج سے بی اے کی سند حاصل کی اور شعبۂ تعلیم سے وابستہ ہوئے۔
1920ء میں پنجاب اسمبلی سے منسلک ہوئے اور وہاں سیکریٹری کے عہدے تک پہنچے۔ وہ مجلسِ زبان دفتری کے سیکریٹری بھی رہے۔ ان کے زیرِ نگرانی ہزاروں انگریزی اصطلاحات کا اردو ترجمہ ہوا۔
حکیم احمد شجاع کو اردو کے صفِ اوّل کے ڈرامہ نگاروں میں شمار کیا جاتا ہے۔ انھوں نے افسانے اور ناول ہی نہیں فلموں کا اسکرپٹ بھی لکھا۔ ان کا طرزِ تحریر منفرد اور اسلوب شان دار تھا۔ خوں بہا کے نام سے ان کی ایک خود نوشت بھی شایع ہوئی۔ حکیم احمد شجاع نے لاہور کے اندرون بھاٹی دروازے کی تاریخ کو لاہور کا چیلسی کے نام سے رقم کیا۔
وہ میانی صاحب کے قبرستان میں آسودۂ خاک ہیں۔
