The news is by your side.

Advertisement

‘سات لاکھ’ سے شہرت حاصل کرنے والے جعفر ملک کی برسی

جعفر ملک کا شمار پاکستان کے مشہور فلم سازوں اور ہدایت کاروں میں ہوتا ہے جو 24 مارچ 2006ء کو وفات پاگئے تھے۔ آج ان کی برسی منائی جارہی ہے۔ انھوں نے اپنے وقت کی مشہور اور کام یاب ترین فلم سات لاکھ کے ہدایت کار کی حیثیت سے نہ صرف شہرت حاصل کی بلکہ کئی فلمی اعزازات بھی اپنے نام کیے تھے۔

اردو زبان میں بننے والی فلم سات لاکھ 1957ء میں ریلیز ہوئی تھی۔ جعفر ملک نے اپنی فلمی زندگی کا آغاز انور کمال پاشا کے فلم ساز ادارے کمال پکچرز سے کیا تھا۔ انھیں جلد ہی سات لاکھ کی ہدایات دینے کا موقع ملا اور اسی فلم کی بدولت ان کی شہرت اور مقبولیت کا سفر شروع ہوا۔ یہ فلم اپنے نغمات کی وجہ سے بھی ملک بھر میں شائقین کی توجہ کا مرکز بنی، اس فلم نے پانچ نگار ایوارڈز حاصل کیے۔

جعفر ملک کی اردو اور پنجابی زبانوں کی دیگر فلموں میں مکھڑا، گلشن، شکاری، کمانڈر، پتھر تے لیک، پنج دریا، سجن مندے کدی کدی، سہنا مکھڑا اور گھبرو شامل ہیں۔

فلم انڈسٹری کے عروج کے زمانے میں جعفر ملک نے خاصا کام کیا اور متحرک رہے، انھوں نے اپنی فلموں کے ذریعے اپنی صلاحیتوں اور فنی مہارت کا اظہار کیا اور خود کو منوایا، لیکن وفات سے تقریبا دو دہائی قبل انڈسٹری سے دور ہوگئے تھے۔

Comments

یہ بھی پڑھیں