آج "دل دل پاکستان” جیسے مقبول ترین ملّی نغمے کے خالق نثار ناسک کی برسی منائی جارہی ہے۔ وہ 3 جولائی 2019ء کو انتقال کرگئے تھے۔ نثار ناسک نے اردو اور پنجابی زبان میں شاعری کی۔
سن 1943ء میں راولپنڈی میں پیدا ہونے والے نثار ناسک کی وجہِ شہرت ”دل دل پاکستان“ تھا جسے جنید جمشید نے گایا تھا۔ اس نغمے نے جنید جمشید کو راتوں رات شہرت اور مقبولیت کی بلندیوں پر پہنچا دیا۔
نثار ناسک کی دو کتابیں ”چھوٹی سمت کا مسافر“ اور ”دل دل پاکستان“ بھی شائع ہوچکی ہیں۔ انھیں پی ٹی وی کی جانب سے لائف ٹائم اچیومنٹ ایوارڈ سے بھی نوازا گیا تھا جب کہ ادبی خدمات کے اعتراف میں انھیں تمغائے حسنِ کارکردگی بھی دیا گیا۔
نثار ناسک کے ملّی نغمے کی مقبولیت کا اندازہ اس بات سے لگایا جاسکتا ہے کہ اسے پاکستان کا دوسرا قومی ترانہ بھی کہا گیا ہے۔
