کراچی : صدرڈاکٹرعارف علوی نے قائداعظم محمد علی جناح کی برسی پر مزارقائد پر حاضری دی اور کہا کہ قائداعظم کے شہر کراچی کی ترقی کیلئے سب مل کرکام کریں گے۔
تفصیلات کے مطابق بانی پاکستان قائداعظم محمد علی جناح کی برسی کے موقع پر صدرڈاکٹرعارف علوی نے مزارقائد پرحاضری دی ، گورنر اور وزیراعلیٰ سندھ بھی صدر عارف علوی کے ہمراہ تھے۔
صدرڈاکٹرعارف علوی نے مزارپر پھول رکھے اور فاتحہ خوانی کی جبکہ مہمانوں کی کتاب میں تاثرات قلمبند کئے۔
اس موقع پر صدرڈاکٹرعارف علوی نے کہا کہ محنت کرکے پورے سندھ کے حالات بہتر کئے جائیں گے ، ڈاکٹرز اور پیرا میڈیکل اسٹاف کورونا کیخلاف صف اول کے ہیروز ہیں۔
صدرمملکت کا کہنا تھا کہ آج ہم سب قائداعظم کے مزار پر حاضری دینے آئے ہیں، قائداعظم کے شہر کراچی کی ترقی کیلئے سب مل کرکام کریں گے، شہر قائد کی ترقی کیلئے وفاق اور صوبائی حکومت ایک ساتھ ہے۔
گورنر سندھ عمران اسماعیل نے میڈیا سے گفتگو میں کہا کہ آج قوم عظیم قائد کو خراج تحسین پیش کررہی ہے، بابائےقوم نے مسلمانوں کیلئے علیحدہ وطن کے خواب کو تعبیر دی، قائداعظم محمد علی جناح نے دو قومی نظریہ کو سچ کر دکھایا۔
گورنر سندھ کا کہنا تھا کہ بابائے قوم ایسی مملکت کے خواہشمند تھےجہاں کوئی تفریق نہ برتی جائے، وہ چاہتے تھے ہر شخص کو انصاف ملے اور تمام حقوق حاصل ہوں، آج کا دن ہمیں قائد کی سوچ و نظریہ کو عملی جامہ پہنانے کی یاد دلاتا ہے۔
پاکستان کشمیر کے بغیر نامکمل ہے،جسے قائد نےپاکستان کی شہ رگ کہا تھا، وہ دن دور نہیں جب مقبوضہ کشمیر بھارتی تسلط سے آزاد ہوگا، انشااللہ کشمیری بھائی اپنا حق خود ارادیت ضرور حاصل کریں گے۔
