پاکستان کے نام وَر سائنس داں ڈاکٹر آئی ایچ عثمانی 17 جون 1992ء کو کراچی میں وفات پاگئے تھے۔ آج ان کی برسی منائی جارہی ہے۔
15 اپریل 1917ء کو پیدا ہونے والے عشرت حسین عثمانی نے بمبئی یونیورسٹی سے بی ایس سی آنرز، مسلم یونیورسٹی علی گڑھ سے ایم ایس سی اور لندن کی جامعہ سے مشہور نوبیل انعام یافتہ سائنس داں جی پی ٹامسن کے زیرِ نگرانی اپنا پی ایچ ڈی مکمل کیا۔
قیامِ پاکستان کے بعد انھوں نے سول سروس میں مختلف اعلیٰ عہدوں پر خدمات انجام دیں جن میں سب سے اہم عہدہ پاکستان اٹامک انرجی کمیشن کی چیئرمین شپ تھا۔ ان کے دور میں پاکستان انسٹیٹیوٹ آف نیوکلیئر سائنس اینڈ ٹیکنالوجی کی بنیاد رکھی گئی اور کراچی میں کینپ کا نیوکلیئر پاور پلانٹ نصب کیا گیا۔ 1972ء میں وہ وزارتِ سائنس اور ٹیکنالوجی کے سیکریٹری مقرر ہوئے جو انہی کی تجویز پر قائم کی گئی تھی۔
حکومتِ پاکستان نے ان کی خدمات کا اعتراف کرتے ہوئے ستارۂ پاکستان اور نشانِ امتیاز عطا کیے تھے۔
آئی ایچ عثمانی کراچی میں ڈیفنس سوسائٹی کے قبرستان میں آسودۂ خاک ہیں۔
