کوہاٹ : درہ آدم خیل میں بیوی کی موت کا صدمہ برداشت نہ کرتے ہوئے شوہر بھی انتقال کرگیا، بیوی کے انتقال کی خبر سن کر شوہر کو بھی دل کا دورہ پڑا جو جان لیوا ثابت ہوا۔
تفصیلات کے مطابق کوہاٹ کے قبائلی سب ڈویژن درہ آدم خیل میں شوہر نے محبت میں وفاداری کی مثال قائم کردی، بیوی کی موت کی خبر سن کر خود بھی جہان فانی سے کوچ کرگیا۔
میڈیا رپورٹ کے مطابق درہ آدم خیل کے گاؤں رحیم کلی زرغن خیل میں حاجی نورمست کی اہلیہ مبینہ طور پر گردوں کی بیماری میں مبتلا تھی اور اس کا مقامی اسپتال میں علاج جاری تھا۔
تاہم مرض کے بڑھ جانے کی وجہ سے وہ اتوار کی صبح انتقال کرگئی جس کی موت کی خبر سن کرمرحومہ کے خاوند حاجی نورمست یہ صدمہ برداشت نہ کرسکے اور دل کا دورہ پڑنے سے وہ بھی جاں بحق ہوگئے۔
دونوں کے جنازے ایک ساتھ گھر سے اٹھے تو عزیز اقارب اس صدمہ پر نہایت رنج زدہ دکھائی دے رہے تھے اور ہر آنکھ پرنم اور فضا سوگوار تھی, بعدازاں دونوں کی نمازہ جنازہ ایک ساتھ پڑھائی گئی جس کے بعد دونوں میاں بیوی کو آبائی قبرستان میں سپرد خاک کردیا گیا۔
