اسلام آباد: پاکستان میں کرونا وائرس انفیکشن سے ہلاکتوں میں کمی آ گئی ہے، تاہم کیسز کی تعداد کے لحاظ سے 213 ممالک میں پاکستان دنیا کا 14 واں ملک ہے۔
تفصیلات کے مطابق گزشتہ چوبیس گھنٹوں کے دوران ملک میں 3,892 نئے کیسز سامنے آئے، جب کہ مزید 60 مریض جاں بحق ہو گئے، نیشنل کمانڈ اینڈ آپریشن سینٹر کی جانب سے جاری اَپ ڈیٹ کے مطابق نئے اور مہلک وائرس کو وِڈ نائنٹین سے پاکستان بھر میں 188,926 افراد متاثر ہو چکے ہیں، جب کہ اموات کی تعداد 3,755 ہو گئی ہے۔
پاکستان میں آبادی کے لحاظ سے کرونا وائرس سے متعلق اعداد و شمار کچھ یوں ہے کہ گزشتہ چند دنوں میں 10 لاکھ آبادی میں اموات کی شرح 16 سے بڑھ کر 17 فی صد ہو چکی ہے، جب کہ 10 لاکھ آبادی میں کیسز کی تعداد بھی بڑھ کر 856 ہو گئی۔ کرونا وائرس کی تشخیص کے لیے کیے جانے والے ٹیسٹس کی شرح 10 لاکھ آبادی میں 5,209 ہے۔
ملک کے مختلف شہروں میں اس وقت کرونا کے زیر علاج مریضوں کی تعداد 1 لاکھ 7 ہزار 417 ہے، اب تک 77,754 مریض وائرس سے لاحق ہونے والی بیماری سے صحت یاب ہو چکے ہیں، جب کہ 3,337 مریضوں کی حالت تشویش ناک ہے۔
کمانڈ سینٹر کا کہنا ہے کہ سب زیادہ اموات پنجاب میں ہوئی ہیں جن کی تعداد 1,516 ہے، اس کے بعد سندھ میں 1,124 اموات، خیبر پختون خوا میں 855 اموات، اسلام آباد میں 108، بلوچستان میں 106، گلگت بلتستان میں 23 اموات جب کہ آزاد کشمیر میں 23 اموات ریکارڈ ہوئی ہیں۔
سندھ میں کرونا کیسز کی تعداد سب سے زیادہ 72,656 ہو گئی، پنجاب میں 69,536 کرونا کیسز رپورٹ ہو چکے ہیں، خیبر پختون خوا میں کیسز کی تعداد 23,388، اسلام آباد میں 11,483 ہو گئی، بلوچستان میں 9,634، گلگت بلتستان میں 1,337 کرونا کیسز رپورٹ ہوئے، آزاد کشمیر میں کیسز کی تعداد 892 ہے۔
گزشتہ 24 گھنٹوں کے دوران ملک میں 23 ہزار 380 کرونا ٹیسٹ کیے گئے، این سی او سی کے مطابق ملک میں اب تک کرونا کے 11 لاکھ 50 ہزار 141 ٹیسٹ کیے جا چکے ہیں۔ سندھ میں 38,401 مریض صحت یاب ہوئے ہیں، پنجاب میں 19,935 مریض، خیبر پختون خوا میں 9,385 مریض، اسلام آباد میں 5,012، بلوچستان میں 3,694 مریض، گلگلت بلتستان میں 961 مریض، جب کہ آزاد جموں و کشمیر میں 366 مریض صحت یاب ہو چکے ہیں۔
