جے آئی ٹی میں سوشل میڈیا پر منفی پروپیگنڈے کی تحقیقات میں عدم تعاون پر پی ٹی آئی کے 20 رہنماؤں کے وارنٹ جاری کرنے کا فیصلہ کیا گیا ہے۔
اے آر وائی نیوز کے مطابق جے آئی ٹی میں سوشل میڈیا پر منفی پروپیگنڈے کی تحقیقات جاری ہیں، تاہم پاکستان تحریک انصاف کے رہنما متعدد نوٹس کے باوجود جے آئی ٹی میں پیش نہ ہوئے۔ تحقیقات میں تعاون نہ کرنے پر پی ٹی آئی کے 20 رہنماؤں کے وارنٹ گرفتاری جاری کرنے کا فیصلہ کیا گیا ہے۔
ذرائع کا کہنا ہے کہ جن رہنماؤں کے وارنٹ گرفتاری جاری کرنے کا فیصلہ کیا گیا ہے۔ ان میں پی ٹی آئی کے مرکزی سیکریٹری اطلاعات شیخ وقاص اکرم سمیت حماد اظہر، زلفی بخاری، عون عباس، میاں اسلم، فردوس شمیم نقوی، تیمور سلیم اور جبرن الیاس شامل ہیں۔
ان کے علاوہ خالد خورشید، شہباز گل، اظہر مشوانی اور دیگر کے بھی وارنٹ گرفتاری جاری کیے جائیں گے۔
ذرائع کا کہنا تھا کہ جے آئی ٹی نے پی ٹی آئی کے رہنماؤں کو پیشی کے متعدد نوٹس بھیجے اور تمام رہنماؤں کے گھروں پر ان نوٹسز کی تعمیل بھی کرائی گئی۔ تاہم وہ پھر بھی پیش نہ ہوئے۔
اب تک جے آئی ٹی میں پی ٹی آئی چیئرمین بیرسٹر گوہر، شبلی فراز، بانی پی ٹی آئی کی ہمشیرہ علیمہ خان سمیت دیگر رہنما پیش ہو چکے ہیں۔
واضح رہے کہ پی ٹی آئی رہنماؤں کیخلاف ریاست مخالف پروپیگنڈے کی تحقیقات کی جا رہی ہیں۔ اس کے لیے پیکا ایکٹ 2016 کے سیشن 30 کے تحت آئی جی اسلام آباد کی سربراہی میں جے آئی ٹی تشکیل دی گئی تھی۔
