گھر چھوٹا ہو یا بڑا جنت کی مانند ہوتا ہے، ہر خاتون خانہ کی خواہش ہوتی ہے کہ اس کا گھر پُرسکون اور خوبصورت ہو چنانچہ وہ اس کو سجانے سنوارنے میں بھر پور دلچسپی لیتی ہے۔
گھر یا کمرے کی سجاوٹ خاتون خانہ کی شخصیت کی عکاس ہوتی ہے، لوگ آپ کے گھر کو دیکھ کر ہی آپ کی کفایت شعاری، سلیقہ شعاری اور تمیز و تہذیب کا اندازہ لگاتے ہیں۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں شوبز اداکارہ فائزہ خان نے بتایا کہ وہ اپنے کمرے کی سجاوٹ اور اس کی دیکھ بھال کا پورا خیال رکھتی ہیں۔
انہوں نے بتایا کہ جب میں بیرون ملک تھی تو وہاں بھی میرا بیڈروم خوبصورت طرح طرح کے شو پیسز سے بھرا ہوتا تھا، پاکستان آکر مجھے کچھ چیزوں کی ضرورت پڑی تو وہیں سے منگوانا پڑیں۔
فائزہ خان نے کہا کہ مجھ سے کسی نے کہا کہ یہاں بھی ایسے بازار ہیں جہاں سے امپورٹڈ اشیاء سستے اور اچھے دام میں مل جاتی ہیں، جب میں اتوار بازار گئی تو حیرت سے میری آنکھیں کھلی کی کھلی رہ گئیں کیونکہ اتنی زبردست امپورٹڈ چیزیں بہت مناسب قیمت پر مل رہی تھیں۔
انہوں نے اتوار بازار سے خریدی ہوئی اشیاء دکھائیں اور ان کی قیمت کے بارے میں ناظرین کو بتایا اور کہا کہ لوگوں کو چاہیے کہ اس طرح کے بچت بازاروں میں ضرور جایا کریں اس میں کوئی شرم کی بات نہیں۔
