بھارتی فلم انڈسٹری کی سپر اسٹار دپیکا پاڈوکون کو نئی جاب ملی ہے اور یہ جاب قطر ایئرویز کی برانڈ ایمبیسیڈر بننے کی ہے۔
بھارتی فلم انڈسٹری کی سپر اسٹار دپیکا پاڈوکون جو درجنوں بالی ووڈ فلموں میں اپنے فن کے جوہر دکھا چکی ہیں اور ان دنوں ان کی شاہ رخ خان کے ہمراہ فلم ’’پٹھان‘‘ دنیا بھر کے باکس آفس پر دھوم مچا رہی ہے۔ ایسے میں دپیکا کے چاہنے والوں کے لیے نئی خبر یہ ہے کہ ان کی پسندیدہ اداکارہ کو قطر ایئرویز نے اپنا برانڈ ایمبیسیڈر مقرر کر دیا ہے۔
عرب میڈیا کے مطابق دپیکا پاڈوکون نے منگل کے روز فوٹو اینڈ ویڈیو شیئرنگ پلیٹ فارم انسٹاگرام پر اپنی ویڈیو میں قطر ایئرویز کی برینڈ ایمبیسیڈر بننے کا اعلان کیا۔
بھارتی اسٹار نے اس حوالے سے کئی ویڈیوز شیئر کی ہیں اور اپنی ایک پوسٹ میں لکھا ہے کہ ’قطر ایئرویز کی گلوبل برینڈ ایمبیسیڈر بننے پر خوشی ہو رہی ہے کیونکہ اس جیسا اور کچھ بھی نہیں ہے۔‘
ویڈیو میں دپیکا پاڈوکون کو فلائٹ میں کھانا کھاتے، تفریح کرتے اور دوحہ کے بین الاقوامی ایئرپورٹ پر محظوظ ہوتے دیکھا جا سکتا ہے۔
View this post on Instagram
قطر ایئرویز کے علاوہ سپر اسٹار اداکارہ مشہور فرانسیسی برینڈ لوئی وٹون اور امریکی فیشن برینڈ لیوائز کی بھی برینڈ ایمبیسیڈر ہیں۔
دپیکا پاڈوکون جنوبی انڈیا کے اداکار پربھاس کے ساتھ ’پروجیکٹ کے‘ نامی فلم بھی کر رہی ہیں جس کا پوسٹر گذشتہ ہفتے ریلیز کیا گیا جب کہ وہ ریتک روشن کے ساتھ اپنے کیریئر کی پہلی فلم بھی کرنے جا رہی ہیں۔
