مشیگن: امریکا میں رات کے وقت سڑک پر ایک چلتی کار سے ہرن نے لمبی چھلانگ لگا کر لوگوں کو حیران کر دیا ہے۔
امریکی ریاست مشیگن میں رات کے وقت سڑک پار کرتے ہوئے ایک چلتی کار سے ہرن نے نہایت مہارت کے ساتھ اونچی اور لمبی چھلانگ لگا کر خود کو تصادم سے بچایا، اس واقعے کو مشیگن اسٹیٹ پولیس کے کروزر کے ڈیش کیم نے ریکارڈ کر لیا۔
کیمرے میں قید یہ ایک دل چسپ اور نایاب لمحہ تھا، جس میں ہرن کو جمناسٹک کے کسی ماہر کی طرح اچھلتے ہوئے دیکھا جا سکتا ہے، ویڈیو میں دو دیگر ہرنوں کو بھی گاڑیوں سے بچتے ہوئے سڑک عبور کرتے دیکھا جا سکتا ہے۔
یہ ویڈیو مشیگن اسٹیٹ پولیس کے ٹویٹر اکاؤنٹ سے شیئر کی گئی ہے، جس میں پولیس نے رہائشیوں کو ڈرائیونگ کے دوران ہرنوں سے بچنے کا مشورہ بھی دیا۔
#DeerLeapsOverCar
Fall has arrived,🍁with that comes the infamous increase of 🦌crossings. Watch here as Tpr. Anderson encounters a small herd & uses quick braking to avoid contact.Reminder: If deer cross your path – apply controlled braking; steer straight; don’t swerve. pic.twitter.com/5NtQ6KBe5o
— MSP Fifth District (@MspSouthwestMI) September 22, 2022
پولیس کا کہنا تھا کہ اس موسم میں ہرنوں کے سڑک پار کرنے کے واقعات میں اضافہ ہو جاتا ہے، اس لیے اگر آپ کے سامنے کوئی ہرن سڑک عبور کرتا دکھائی دے تو گاڑی کو ادھر ادھر ہرگز مت گھمائیں، بلکہ سیدھ میں چلتے رہیں، اور کنٹرولڈ بریکنگ سے کام لیں۔
