کراچی: پولیس حکام کا کہنا ہے کہ ڈیفنس تھانے پر نامعلوم شہریوں نے حملہ کیا ہے، جب کہ وکلا نے پولیس فائرنگ سے قانون کے 4 طالب علموں کے زخمی ہونے کا دعویٰ کیا ہے۔
تفصیلات کے مطابق گزشتہ رات ڈیفنس تھانے پر نامعلوم افراد نے دھاوا بولا اور توڑ پھوڑ کی، پولیس حکام نے کہا ہے کہ حملہ آوروں پر لاٹھی چارج کیا گیا جس سے 2 نوجوان معمولی زخمی ہوئے، تاہم گولی سے کوئی زخمی نہیں ہوا۔
پولیس کے مطابق علاقے میں ڈکیتی کی اطلاع پر 3 نوجوان موٹر سائیکل پر ناکے پر روکے گئے تھے، لیکن نوجوانوں کی پولیس سے بدتمیزی پر انھیں تھانے منتقل کیا گیا، جنھیں بعد ازاں لوگوں کی ضمانت پر رہا کر دیا گیا، رہائی کے بعد سو سے ڈیڑھ سے افراد نے تھانے پر حملہ کیا، جن پر پولیس نے لاٹھی چارج کیا۔
دوسری طرف وکلا نے دعویٰ کیا ہے کہ پولیس اہلکاروں کی فائرنگ سے لا کے 4 طالب علم زخمی ہوئے، قادر راجپر ایڈووکیٹ نے بتایا کہ پولیس نے 2 طالب علموں کو چیکنگ کے دوران گرفتار کیا، اور انھیں تھانے منتقل کر کے تذلیل کی گئی، جب پولیس کے خلاف درخواست دینے تھانے پہنچے تو تلخ کلامی ہوئی، جس پر پولیس نے فائرنگ کر دی اور چار طالب علم زخمی ہوئے۔
قادر راجپر ایڈووکیٹ کے مطابق 2 زخمی جناح اور 2 این ایم سی میں زیر علاج ہیں، انھوں نے آئی جی سندھ سے اہلکاروں کے خلاف کارروائی کا مطالبہ بھی کیا ہے۔
