کیف: یوکرینی بندرگاہ اوڈیسا پر گزشتہ روز روس نے میزائل داغے تھے، جن میں سے دو میزائل فضا میں روکے جانے کی ویڈیو سامنے آ گئی ہے۔
تفصیلات کے مطابق روس اور یوکرین جنگ کی کوریج کرنے والے ایک رپورٹر نے اپنے ٹویٹر اکاؤنٹ پر ایک ویڈیو شیئر کی ہے، جو کسی خاتون نے بنائی تھی، ویڈیو میں میزائلوں کو روکنے کا منظر دکھائی دیتا ہے۔
ٹویٹ میں کہا گیا کہ ساحل سے خاتون نے جب یوکرین کے میزائل ڈیفنس سسٹم کو اوڈیسا کی بندرگاہ کو نشانہ بنانے والے 2 روسی میزائلوں کو روکتے ہوئے دیکھا تو کہا ‘واہ بہت خوب۔”
واضح رہے کہ یوکرینی فوج کے آپریشنل کمانڈ ساؤتھ نے ہفتے کے روز ٹیلی گرام پر لکھا تھا کہ دشمن نے اوڈیسا سمندری تجارتی بندرگاہ پر کلیبر کروز میزائلوں سے حملہ کیا، 2 میزائلوں کو فضائی دفاعی فورسز نے مار گرایا جب کہ 2 نے بندرگاہ کے بنیادی ڈھانچے کو نشانہ بنایا۔
“Woo! Good job,” says a woman on the beach watching Ukraine’s missile defense system intercept two Russian missiles targeting the Port of Odesa today. pic.twitter.com/Zvrzy0LRGu
— Christopher Miller (@ChristopherJM) July 23, 2022
یوکرینی فوج کے مطابق روس اور یوکرین کے درمیان بحیرۂ اسود کی بندرگاہوں کو دوبارہ کھولنے کے معاہدے پر دستخط کرنے کے ایک دن بعد روسی میزائلوں نے یوکرین کی بندرگاہ اوڈیسا میں انفرا اسٹرکچر کو نشانہ بنایا۔
بندرگاہ اوڈیسا پر گرنے والے میزائل کی ویڈیو
یوکرین کی مقامی میڈیا کے مطابق جو میزائل بندرگاہ پر انفرا اسٹرکچر تک پہنچنے میں کامیاب ہوئے ان سے بھی کوئی خاص نقصان نہیں ہوا۔
یوکرین کے صدر ولودیمیر زیلنسکی نے اس حملے کو ’بربریت‘ قرار دیا، یاد رہے کہ ترک صدر کی ثالثی سے 2 روز پہلے یوکرین اور روس کے درمیان اناج کی برآمدات کے لیے معاہدہ ہوا تھا۔