لاہور : طاقتور شخصیت کے بھتیجے اور تگڑے بیورو کریٹ خاندان کے چشم و چراغ کی سروس فائل کی اسکروٹنی کے دوران نیا پنڈورا باکس کھل گیا۔
تفصیلات کے مطابق ملک کی بااثر شخصیت کے قریبی عزیز کی پنجاب کے اہم ترین ادارے میں بھرتی کی انوکھی کہانی سامنے آگئی۔
طاقتور شخصیت کے بھتیجے اور تگڑے بیورو کریٹ خاندان کے چشم و چراغ کی سروس فائل کی اسکروٹنی کے دوران نیا پنڈورا باکس کھل گیا۔
ذرائع نے بتایا کہ پنجاب ریونیو اتھارٹی میں سات سال قبل کنٹریکٹ پر بھرتی ہونے والے ڈائریکٹر آئی ٹی سلمان ظفر کی ڈگری ہی غیرمتعلقہ نکلی ۔
ذرائع کا کہنا تھا کہ سات سال کے دوران چیئرمین پنجاب ریونیو اتھارٹی سے بھی زیادہ ماہانہ تنخواہ وصول کرنے والے ڈائریکٹر آئی ٹی سلمان ظفر تعلیمی قابلیت کے معیار پر پورے نہیں اترتے تھے۔
سات اگست دو ہزار پندرہ کو اخبارمیں ڈائریکٹر آئی ٹی کی آسامی کیلئے اشتہار دیا گیا، کمپیوٹر سائنس یا آئی ٹی میں ماسٹر ڈگری ہولڈر امیدوار ڈائریکٹر آئی ٹی کی آسامی کیلئے اہل تھا جبکہ سلمان ظفر کی تعلیمی قابلیت بی ایس الیکٹریکل انجینئرنگ تھی۔
کئی اہل امیدواروں کی تعلیمی قابلیت کو نظرانداز کرکے تگڑی سفارش پر سلمان ظفر کو غیرقانونی طور پر تین سالہ کنٹریکٹ پر بھرتی کرلیا گیا۔
نگران دورِ حکومت میں سلمان ظفر کو براہ راست گریڈ انیس میں ریگولر کرنے کی کوشش میں ابتدائی بھرتی کا بھی پول کھل گیا۔
پنجاب ریونیو اتھارٹی کے ڈائریکٹر آئی ٹی سلمان ظفر نے اپنے بااثر چچا کا اثر و رسوخ استعمال کرکے گریڈ انیس میں ریگولر ہونے کی کوشش کی۔
اسکروٹنی کمیٹی نے پی آر اے کے طاقتور ڈائریکٹر آئی ٹی کی سروس فائل کی اسکروٹنی کے دوران ابتدائی بھرتی پر سنگین اعتراضات عائد کردیئے۔
اسکروٹنی کمیٹی نے سلمان ظفر کی غیر متعلقہ ڈگری کے باعث ان کی ابتدائی بھرتی کے عمل کو مشکوک اور غیر قانونی قرار دے کر تحقیقات کی سفارش کی۔
چیئرمین پی آراے جاوید بدر نے ڈائریکٹر آئی ٹی سلمان ظفر کا کیس تحقیقات کیلئے محکمہ خزانہ کو بھجوانے کی بجائے دبا لیا۔
ڈائریکٹر آئی ٹی سلمان ظفر کا کہنا تھا کہ میرٹ پر بھرتی ہوا، اسکروٹنی کمیٹی کے اعتراضات بے بنیاد ہیں، ڈگری کے مطابق ہی بھرتی ہوا، سکروٹنی کمیٹی نے جان بوجھ کر اعتراض لگایا ہے۔
