نئی دہلی: بھارت میں خستہ حال عمارت کھیلتے بچوں پر آن گری۔
بھارتی میڈیا کے مطابق واقعہ دہلی کے علاقے سبزی منڈی میں پیش آیا، جہاں چار منزلہ پرانی عمارت اچانک منہدم ہوگئی۔
مقامی پولیس کے مطابق جس وقت یہ واقعہ ہوا، اس وقت بچے سڑک پر کھیل رہے تھے، عمارت کے ملبے تلے دب کر دو بچوں کی موت واقع ہوگئی جبکہ متعدد افراد کو زخمی حالت میں ملبے سے نکال کر اسپتال منتقل کیا۔
فائر بریگیڈ حکام کا کہنا ہے کہ صبح تقریباً بارہ بجے انہیں اطلاع موصول ہوئی کہ ایک پرانی خستہ حال عمارت منہدم ہوگئی ہے جس کے فوری بعد فائر بریگیڈ اور پولیس کی ٹیم موقع پر پہنچی اور زخمیوں کو باہر نکال کر اسپتال منتقل کیا۔
بھارت میں آئے روز خستہ حال عمارتیں گرنے کے واقعات رونما ہوتے رہتے ہیں، رواں سال جون میں مون سون بارشوں کے باعث رہائشی عمارت گرنے کا واقعہ ساحلی شہر ممبئی میں پیش آیا تھا جہاں تین منزلہ عمارت بنیادیں کمزور ہونے کی وجہ سے اچانک برابر والی عمارت کے اُوپر جاگری، واقعے میں گیارہ افراد ہلاک جب کہ سات زخمی ہوئے تھے۔
رواں سال اگست میں بھی ممبئی سے160کلومیٹر دور رائے گڑ ضلع میں پانچ منزلہ عمارت منہدم ہوجانے سے کم ا زکم دو افراد ہلاک اور متعدد زخمی ہوئے تھے۔
