The news is by your side.

بھارتی شہری نے بم کی جھوٹی اطلاع دے کر پرواز کیوں رکوائی؟

نئی دہلی: اپنے دو دوستوں کی الوداعی ملاقات کو طویل کرنے کے لیے بھارتی شہری نے نجی ایئرلائن کی پرواز کو بم کی جھوٹی اطلاع بھیج کر رکوا دیا، تاہم اسے یہ حرکت نہایت مہنگی پڑ گئی۔

بھارتی میڈیا کے مطابق دہلی پولیس نے دوارکا کے رہنے والے 24 سالہ ابھیناؤ پرکاش کو جمعہ کے روز پونے جانے والی اسپائس جیٹ کی فلائٹ کے ٹیک آف سے قبل جعلی بم کی اطلاع دینے پر گرفتار کر لیا۔

پرکاش نے پولیس کو بتایا کہ اس نے جعلی بم کال اس لیے کی تاکہ اس کے دوست اپنی گرل فرینڈز کے ساتھ زیادہ وقت گزار سکیں، جو اسپائس جیٹ کی فلائٹ سے دہلی سے روانہ ہو رہے تھے۔

بم کی اطلاع ملنے پر ایئر لائن نے پونے جانے والی فلائٹ کی روانگی کو روک دیا اور جہاز کی مکمل تلاشی لی گئی، تاہم حکام کو جہاز میں سے کوئی مشکوک چیز نہ ملی۔

دہلی پولیس نے کالر کو ڈھونڈنے کے لیے ایک ٹیم تشکیل دی، جنھوں نے ابھیناؤ پرکاش کو ڈھونڈ نکالا، جو برٹش ایئر ویز کے ٹکٹنگ کاؤنٹر پر ایک ٹرینی کے طور پر کام کر رہا تھا۔

ایئر لائن کے ترجمان نے جمعے کو کہا کہ دہلی سے پونے جانے والی فلائٹ کو آئی جی آئی ایئر پورٹ سے ساڑھے چھ بجے روانہ ہونا تھا، تاہم روانگی سے چند منٹ قبل پرواز کے ریزرویشن آفس میں کال موصول ہوئی کہ جہاز میں بم ہے۔

ترجمان نے مطابق اطلاع کے وقت فلائٹ میں مسافروں کی بورڈنگ شروع نہیں ہوئی تھی، کال کے بعد جہاز کو عمارت سے دور لے جایا گیا اور بم کو تلاش کیا گیا۔

پولیس نے بتایا کہ ملزم کے دوست اپنی گرل فرینڈز کے ساتھ مزید کچھ وقت گزارنا چاہتے تھے اور انھوں نے ملزم سے کوئی راستہ تلاش کرنے کا کہا تھا، تاکہ فلائٹ تاخیر سے روانہ ہو۔

Comments

یہ بھی پڑھیں