نئی دہلی: بھارتی دارالحکومت 2 دن کی موسلا دھار بارش میں ڈوب گیا، دہلی میں گزشتہ روز بارش کا 88 سالہ ریکارڈ ٹوٹ گیا۔
تفصیلات کے مطابق دہلی میں بارش نے مودی سرکار کے 10 سالہ راج کی کارکردگی کی قلعی کھول کر رکھ دی، 228 ملی میٹر بارش ریکارڈ کی گئی ہے، جو دارالحکومت میں جون کے مہینے میں ریکارڈ کی گئی سب سے زیادہ بارشوں میں سے ایک ہے۔
دہلی کے متعدد علاقے پانی میں ڈوب چکے ہیں، لوگ گھروں میں محصور ہو کر رہ گئے ہیں، گھروں کے اندر پانی آنے سے کروڑوں روپے مالیت کا نقصان ہوا، لوگوں نے نقل و حمل کے لیے کشتیاں نکال لیں۔
مختلف حادثات میں 2 بچوں سمیت 5 افراد ہلاک ہوئے ہیں، بارش کے پانی سے بھرے ہوئے گڑھے میں نہاتے ہوئے 2 بچے ڈوب گئے۔
بارش کے باعث نظام زندگی درہم برہم ہو گیا ہے، سڑکیں ندی نالوں کا منظر پیش کرنے لگی ہیں، جب کہ کئی پروازیں منسوخ ہو گئیں، دوسری طرف پینے کے پانی کا بحران مزید شدت اختیار کر گیا ہے، بجلی کی بندش نے بھی رہی سہی کسر پوری کر دی ہے۔
محکمہ موسمیات نے آئندہ 5 روز تک ہلکی سے معتدل بارش کا امکان ظاہر کیا ہے جب کہ دہلی کے کچھ حصوں میں مزید تین روز تک بارش ہوتی رہے گی۔
