برطانیہ میں رنگا رنگ ڈیلفینم پھولوں کی بہار نے شہریوں کو مسحور کردیا، لوگوں کی بڑی تعداد ان پھولوں کے درمیاں تصاویر بنوانے کے لیے یہاں پہنچ گئی۔
برطانوی کاؤنٹی ووسٹر شائر میں وسیع رقبے پر اگے ڈیلفینم کے پھولوں نے شہر کو رنگین بنا دیا۔ ان پھولوں کی پتیاں شادیوں اور دیگر تقریبات میں نچھاور کرنے (کنفیٹی) کے لیے استعمال کی جاتی ہیں اور یہ ایک بڑا کاروبار ہے۔
رنگین پھولوں کو دیکھنے کے لیے ہزاروں مقامی افراد و سیاحوں نے یہاں کا رخ کیا اور ان پھولوں کے درمیان خوبصورت لمحات گزارے۔ اس دوران ڈرون کیمروں سے اس حسین منظر کے شاٹس بھی لیے گئے۔
گزشتہ ہفتے ہزاروں افراد کے دورے کے بعد اب یہاں عام افراد کا داخلہ بند کردیا گیا ہے، اب کسان ان پھولوں کی کٹائی کریں گے جس کے بعد ان سے کنفیٹی بنائی جائے گی۔
یہ کنفیٹی ماحول دوست بھی ہوتی ہے جو ماحول کو کسی قسم کا نقصان پہنچائے بغیر زمین کا حصہ بن جاتی ہے۔
برطانیہ میں ہزاروں کی تعداد میں افراد ان پھولوں کی افزائش اور بعد ازاں کنفیٹی کے کاروبار سے منسلک ہیں۔
