غزہ : اسرائیلی فوج کی بمباری کے نتیجے میں غزہ میں ہونے والی تباہی پر اقوام متحدہ کی رپورٹ نے دنیا کو ہلا کر رکھ دیا ہے۔
اس حوالے سے اقوام متحدہ کے انسانی ہمدردی کے ادارے او سی ایچ اے نے اپنی تازہ رپورٹ میں کہا ہے کہ غزہ کی پٹی میں فلسطینیوں پر بمباری کے نتیجے میں 2 لاکھ 60ہزار سے زیادہ لوگ اپنے گھر بار چھوڑنے پر مجبور ہوگئے ہیں۔
انہوں نے فلسطینی حکام کا حوالہ دیتے ہوئے کہا کہ بمباری کی مہم نے 1ہزار سے زائد مکانات کو تباہ کردیا ہے اور 560 کو اس قدر شدید نقصان پہنچا ہے کہ وہ ناقابل رہائش ہیں۔
انہوں نے متنبہ کیا ہے کہ جو لوگ بے گھر نہیں ہوئے ہیں ان کے لیے بنیادی ضروریات کو پورا کرنے مشکل ہوتا جا رہا ہے۔
انہوں نے مزید بتایا کہ اسرائیل نے غزہ کی پٹی پر پہلے سے ہی ناکہ بندی کر رکھی ہے اور علاقے کا مکمل محاصرہ کر کے خوراک، پانی، ایندھن کی ترسیل روک دی ہے اور اس اقدام سے پہلے سے ہی سنگین انسانی صورتحال مزید خراب ہو جائے گی۔
