انسان اپنی بہتر صحت کیلئے بہت سے جتن کرتا ہے جس کیلئے صحت مند غذا کا استعمال انتہائی ضروری ہے، اس سلسلے میں پھل اور سبزیاں انتہائی اہمیت کی حامل ہیں۔
اس حوالے سے ایک ایسا مشروب بھی ہے جو انسانی صحت کو تقویت دے سکتا ہے، اس مشروب کو ڈیٹاکس واٹر کہتے ہیں، جو تازہ پھلوں اور سبزیوں کے ذائقوں سے بھرپور ہوتا ہے، اسے عام الفاظ میں پھلوں سے بھرا ہوا پانی یا پھلوں کے ذائقے والا پانی بھی کہا جاتا ہے۔
ڈیٹاکس واٹر کیا چیز ہے اور اس کے فوائد اور نقصانات کیا ہیں؟ اے آر وائی نیوز کے پروگرام باخبر سویرا میں ماہر غذائیات ڈاکٹر عائشہ عباس نے اس مشروب سے متعلق ناظرین کو آگاہ کیا۔
انہوں نے بتایا کہ یہ مشروب مخصوص قسم کے پھل اور سبزیوں سے بنتا ہے ایسا نہیں کہ کوئی بھی چیز لے اس سے ڈیٹاکس واٹر بنا لیا جائے۔ اس میں ایسی کوئی چیز نہیں ڈال سکتے جو لیس دار ہو جیسے بھنڈی یا ایلو ویرا وغیرہ۔
ان کا کہنا تھا کہ سادے پانی میں پھلوں اور سبزیوں کو چند گھنٹے بگھو کر حاصل ہونے والے پانی کو ڈیٹاکس واٹر کہتے ہیں، اس طریقے سے پانی میں سبزیوں اور پھلوں کی سب غذائیت مل جس کے سبب اس کے استعمال سے صحت پر مثبت اثرات مرتب ہوتے ہیں۔
انہوں نے بتایا کہ ڈیٹاکس واٹر بنانے کیلیے لیموں، ادرک، کھیرا، پودینے کے پتوں، بلیک بیری، نارنجی کھیرا، اسٹرا بیری، سیب کے ساتھ ایک انچ کا ٹکرا دار چینی اور اپنی پسند کے مطابق کچھ بھی سادے پانی میں ملایا جا سکتا ہے۔
ڈاکٹر عائشہ عباس نے کہا کہ اس مشروب کو روزانہ کی بنیاد پر تازہ بنایا جاتا ہے اور یہ زیادہ سے زیادہ بارہ گھنٹے تک قابل استعمال ہوتا ہے، جو لوگ شوگر کے مریض ہیں اس میں کوئی میٹھی چیز استعمال نہیں کریں۔
ان کا کہنا تھا کہ چونکہ یہ پھلوں اور سبزیوں کو پانی میں ڈال کر بنایا جاتا ہے، اس لیے اس میں بہت کم کیلوریز ہوتی ہیں۔
ڈاکٹر عائشہ عباس نے کہا کہ ڈیٹاکس واٹر استعمال کرنے سے متعلق بہت سی غلط فہمیاں پائی جاتی ہیں جنہیں دور کرنا نہایت لازمی ہے، بیشتر افراد یہ سمجھتے ہیں کہ ڈیٹاکس واٹر کے استعمال سے وزن کم ہوگا یا چربی کو ختم کرے گا اور ہم وہ سب کچھ کھا پی سکتے ہیں اور ڈیٹاکس واٹر سب کا ازالہ کر دے گا۔
ڈیٹاکس واٹر کے روزانہ نہار منہ کی بنیاد پر استعمال سے انسانی صحت بہتر ہوتی ہے، جسمانی اعضاء کی کارکردگی میں مثبت فرق پڑتا ہے اور انسان متعدد بیماریوں سمیت سو بیماریوں کی جڑ موٹاپے اور پیٹ کے گرد جمی چربی میں اضافے سے بھی محفوظ جاتا ہے۔
