کراچی : قومی اسمبلی کی قائمہ کمیٹی برائے کیبنٹ کے اجلاس میں ملک کے بارڈر کی حیثیت رکھنے والے ائیرپورٹس کی سیکورٹی تسلی بخش قرار قرار دیا۔
تفصیلات کے مطابق قومی اسمبلی کی قائمہ کمیٹی برائے کیبنٹ کا سول ایوی ایشن ہیڈ کواٹر میں سی اے اے اور اے ایس ایف سے متعلق اجلاس ہوا، اجلاس کی صدارت چئیر مین امین الحق نے کی۔
اجلاس میں اے ایس ایف کو ملک کی خاطر جانوں کا نذرانہ دے کر ہوا بازی کی اہم صنعت کی حفاظت کرنے خراج تحسین پیش کیا گیا، سیاحت کے فروغ کے لیے سول ایوی ایشن اتھارٹی کے اقدامات کی تعریف کی گئی۔
اس موقع پر ڈی جی اے ایس ایف میجر جنرل ظفرالحق کا کہنا تھا کہ اے ایس ایف ملک کے تمام ائیرپورٹ پر اپنے فرائض پیشہ وارانہ طور پر انجام دے رہی ہے جبکہ ملک کے بارڈرکی حیثیت رکھنے والے ائرپورٹس کی حفاظت کررہی ہے۔
چیئرمین امین الحق کا کہنا تھا کہ سول ایوی ایشن اتھارٹی سکیورٹی کی مد میں مسافروں سے ڈالرز میں چارجز وصول کرتی ہے سول ایوی ایشن اے ایس ایف کی ضروریات کو پورا کرے۔
اجلاس میں قائمہ کمیٹی کو بریفنگ دیتے ہوئے سول ایوی ایشن حکام کا کہنا تھا کہ برٹش ایئرویز کی پروازوں کا پاکستان میں فضائی آپریشن خوش آئندہ ہے۔
دوسری غیر ملکی ائرلائنز نے بھی ملکی سیکورٹی کی صورتحال بہتر ہونے پردلچسپی ظاہر کی ہے۔ سول ایوی ایشن حکام نے کہا کہ پاکستان کے تمام ہوائی اڈوں پردور جدید کے مطابق سہولیات فراہم کی جارہی ہیں،جبکہ درکارآلات بھی نصب کیے جارہے ہیں۔
