کراچی: ڈیفنس اتحاد کمرشل میں نوجوان پر تشدد کرنے والا بااثرشخص سلمان فاروقی کو 2 روزہ جسمانی ریمانڈ پر پولیس کے حوالے کردیا گیا۔
تفصیلات کے مطابق ڈیفنس اتحاد کمرشل میں نوجوان کو تشدد کا نشانہ بنانے کے مقدمہ کی سٹی کورٹ میں سماعت ہوئی۔
ملزم سلمان فاروقی کے وکیل نعیم قریشی بھی عدالت میں پیش ہوئے، سلمان فاروقی کی جانب سے ضمانت کی درخواست دائر کی۔
عدالت کو بتایا ملزم کے خلاف دھمکیاں دینے کا مقدمہ قابل ضمانت ہے تو تفتیشی افسر نے کہا استدعا کی ملزمان کا جسمانی ریمانڈ دیا جائے۔
جس پر وکیل صفائی نے کہا ملزم کا ایک دن کیلئے جسمانی ریمانڈ دے دیں، عدالت نے دو دن کے جسمانی ریمانڈ پر ملزموں کو پولیس کے حوالے کردیا۔
عدالت نے آئندہ سماعت پر پیش رفت رپورٹ پیش کرنے کا حکم دیتے ہوئے سماعت ملتوی کردی۔
مزید پڑھیں : کراچی: ڈیفنس میں نوجوان کو تشدد کا نشانہ بنانے والا بااثر شخص سلمان فاروقی گرفتار
گذشتہ روز پولیس نے نوجوان پر تشدد کرنےوالے ملزم سلمان فاروقی کو ڈیفنس فیز ایٹ سے گرفتار کیا تھا، ہتھکڑی لگاملزم اپنی مرسڈیز چلا کر تھانے پہنچا۔
پولیس کا کہنا تھا تفتیشی افسر کار چلانا نہیں جانتاتھا اس لیے ملزم نے ڈرائیونگ سیٹ سنبھالی۔
یاد رہے موٹرسائیکل کی معمولی ٹکر پر آپے سے باہر ہوکر ملزم سلمان فاروقی نے نوجوان پرگارڈز کے ساتھ ملکر تشدد کیا تھا۔
ملزم نے گالیاں اوردھمکیاں دیں اور نوجوان کی بہن ہاتھ جوڑتی رہی لیکن ملزم کے کان پرجوں تک نہ رینگی۔
ملزم نے خواتین کو بھی دھکے دیے ساتھ ہی جان سے مارنےکی دھمکیاں دیں، تشدد اور ہجوم میں بےعزت کیا۔
