کراچی: صوبہ سندھ کے دارالحکومت کراچی میں ایک دفتر کی ڈیجیٹل تجوری سے 5 لاکھ روپے چوری کرلیے گئے، دفتر غیر ملکی افراد کے زیر استعمال تھا۔
تفصیلات کے مطابق ڈسٹرکٹ سینٹرل میں غیر ملکی افراد کے دفتر سے 5 لاکھ روپے چوری ہوگئے، واردات ڈی ایم سی میں قائم دفتر کے ڈیجیٹل لاکر میں کی گئی۔
اطلاع ملتے ہی پولیس کی نفری پہنچ گئی جبکہ کرائم سین یونٹ کو بھی طلب کرلیا گیا، کرائم سین یونٹ نے تمام شواہد جمع کرلیے۔
پولیس حکام کا کہنا ہے کہ غیر ملکی باشندوں کا دفتر ڈی ایم سی دفتر کے اندر تھا، ڈیجیٹل لاکر کی 3 چابیاں بنی ہوئی تھیں، 2 چابیاں غیر ملکی عملے اور ایک آفس بوائے کے پاس تھی۔
حکام کا کہنا تھا کہ ڈیجیٹل لاکر کا کوڈ صرف غیر ملکی عملے کے پاس تھا، لاکر سے فنگر پرنٹس حاصل کر لیے گئے۔ غیر ملکی شہری کے مطابق لاکر سے 5 لاکھ روپے چوری ہوئے۔
پولیس حکام کے مطابق ڈیجیٹل لاکر پر کوئی بھی نشانات نہیں ملے، ملازمین کے بیانات قلم بند کر لیے ہیں، غیر ملکی باشندوں سے بھی بیانات لے لیے ہیں اور مزید تفتیش جاری ہے۔
