دنیا بھر میں ہر جگہ کا کوئی خاص پکوان شہرت رکھتا ہے۔ کراچی اور لاہور کے بھی کچھ پکوان نہایت مشہور ہیں، ایسے ہی دلی کی نہاری بھی ایشیائی ممالک میں بے حد مقبول ہے۔
آج ہم آپ کو اسے گھر پر تیار کرنے کی ترکیب بتا رہے ہیں۔
اجزا
بیف: 750 گرام
نمک: حسب ذوق
لال مرچ پاؤڈر: 1 کھانے کا چمچ
کشمیری مرچ پاؤڈر: آدھا چائے کا چمچ
تیل: ڈیڑھ کپ
لال آٹا: حسب ضرورت
ادرک (پانی میں بھگو لیں): 1 چائے کا چمچ
لہسن: 1 پوتھی
گارنش کے لیے
ادرک: ڈیڑھ انچ کا ٹکڑا، سلائس میں کاٹ لیں
دھنیہ کٹا ہوا: 2 کھانے کے چمچ
ہری مرچ کٹی ہوئی: 3 سے 4 عدد
لیموں: 2 عدد
نہاری مصالحہ کے لیے
سونٹھ: 3 ٹکڑے
ململ کا کپڑا: حسب ضرورت
سونف: ڈیڑھ کھانے کا چمچ
شاہ زیرہ: 2 کھانے کے چمچ
کالی الائچی: 4 عدد
لونگ: 10 عدد
پیاز: 5 عدد
ادرک لہسن پیسٹ: 1 کھانے کا چمچ
ہلدی: 1 چائے کا چمچ
گھی: پکانے کے لیے
کالی مرچ: آدھا چائے کا چمچ
ترکیب
سب سے پہلے بیف لے لیں اور اس میں ادرک لہسن کا پیسٹ اور ہلدی ڈال کر اسے ابالیں تاکہ گوشت کی بساند ختم ہو جائے اور گوشت گل جائے، ساتھ ہی اس کا پانی بھی تیار ہو جائے۔
اب پین میں گھی گرم کریں اور پیاز کو ادرک اور لہسن کے پانی سے فرائی کریں۔
پھر اس میں لال مرچ پاؤڈر، کشمیری مرچ پاؤڈر، نمک اور بیف گوشت کا پانی شامل کریں اور بھونتی جائیں۔
تھوڑی دیر بعد گوشت بھی شامل کردیں۔
پھر ململ کے کپڑے میں سونف، شاہ زیرہ، کالی مرچ، کالی الائچی، سونٹھ، لونگ اور ہری الائچی ڈال کر اسے باندھ کر شامل کر دیں۔
اب لال آٹا 4 کھانے کے چمچ کے برابر لے کر پانی میں گھول لیں اور نہاری میں شامل کردیں۔
اب آنچ ہلکی کر دیں اور اسے مزید پکائیں۔
پھر ململ کے کپڑے کی تھیلی نکال لیں اور نہاری کو دم پر رکھ دیں۔
آخر میں دھنیہ چھڑک کر گارنشنگ کر لیں اور ساتھ ہی پلیٹ میں ادرک، ہری مرچیں اور لیموں سجا کر پیش کریں۔
دلی کی خاص نہاری تیار ہے۔
