بالی وڈ ہدایت کار امتیاز علی کی حال ہی میں ریلیز ہونے والی فلم ’امرسنگھ چمکیلا‘ کے لیے ان کی تعریف کی جارہی ہے۔
اپنے ایک انٹرویو میں انھوں نے انکشاف کیا کہ وہ صرف اس بارے میں شکوک و شبہات کا شکار تھے کہ وہ لوگ فلم کے بارے میں کیا رائے دیں گے جو حقیقی زندگی میں پنجابی گلوکار چمکیلا کو جانتے ہیں۔
امتیاز نے بتایا کہ وہ خاص طور پر گلوکار کی پہلی بیوی سے تھوڑے ڈر گئے تھے اور انھوں نے یہاں تک سوچا تھا کہ چمکیلا کی اہلیہ ان پر حملہ کردیگی۔
انٹرویو میں امتیاز نے کہا کہ چمکیلا کی فیملی اسکریننگ کے دوران ان کی پہلی بیوی گرمیل کور وہاں موجود تھیں۔ امرجوت اور چمکیلا کا بیٹا جمن چمکیلا بھی وہاں موجود تھا۔ چمکیلا کی بیٹیاں بھی ساتھ تھیں۔
جب میں فلم دیکھ رہا تھا تو ان کی پہلی بیوی میرے بالکل ساتھ ہی بیٹھی ہوئی تھیں اور میں سوچ رہا تھی کہ فلم میں کچھ حساس مناظر ہیں، کیا مجھے یہاں سے جانا چاہیے، اس سے پہلے کہ وہ مجھ پر حملہ کریں یا ایسا ہی کچھ کرنے کا ارادہ کریں۔
امتیاز نے بتایا کہ جب اسکریننگ ختم ہوئی تو چمکیلا کی بیوی نے مجھے گلے لگایا اور جس طرح چمکیلا کی تصویر کشی کی گئی تھی ہر کوئی وہاں پر بہت خوش تھا کیونکہ ہمیں امید تھی کہ وہ اسے پسند کریں گے۔
واضح رہے کہ امر سنگھ چمکیلا بھارتی پنجابی گلوکار اور ان کی اہلیہ کی حقیقی زندگی پر مبنی کہانی ہے جنھیں کم عمری میں قتل کر دیا گیا تھا۔
دلجیت دوسانجھ نے فلم میں چمکیلا کا کردار ادا کیا ہے جبکہ پرینیتی چوپڑا نے ان کی گلوکارہ بیوی امرجوت کا کردار ادا کیا ہے۔ مذکورہ فلم 12 اپریل کو نیٹ فلکس پر ریلیز کی گئی ہے۔
