لاہور: کرکٹر عمر اکمل کیس کی سماعت 27 اپریل کو نیشنل کرکٹ اکیڈمی میں ہوگی۔
تفصیلات کے مطابق ٹیسٹ کرکٹر عمر اکمل کیس کی سماعت 27 اپریل کو نیشنل کرکٹ اکیڈمی میں ہوگی، عمر اکمل پر میچ فکسنگ کی پیشکش رپورٹ نہ کرنے کا الزام ہے۔
عمر اکمل نے الزامات کے خلاف جرح نہ کرنے کا فیصلہ کیا ہے، سماعت ڈسپلنری کمیٹی کے سربراہ جسٹس (ر) فضل میراں چوہان کریں گے۔
واضح رہے کہ 9 اپریل کو پاکستان کرکٹ بورڈ نے عمر اکمل کے معاملے کو ڈسپلنری پینل کے سپرد کیا تھا۔
گزشتہ ماہ پی سی بی نے عمر اکمل کو اینٹی کرپشن کوڈ کے آرٹیکل 2.4.4 کی 2 مرتبہ خلاف ورزی کرنے پر چارج کردیا تھا۔
مزید پڑھیں: عمر اکمل کا معاملہ ڈسپلنری پینل کے سپرد
یہ آرٹیکل کسی بھی فرد کی جانب سے کرپشن کی پیشکش کے بارے میں پی سی بی ویجلنس اینڈ سیکورٹی ڈیپارٹمنٹ کو (بغیر کسی غیر ضروری تاخیر سے) آگاہ نہ کرنا ہے۔
عمر اکمل نے دی گئی مہلت میں اپنا جواب پی سی بی کو جمع کروا دیا تھا اور ذرائع کا کہنا تھا کہ عمر اکمل طے شدہ سزا پر اصرار کر رہے ہیں۔
یاد رہے کہ عمر اکمل کو 20 فروری 2020 کو عبوری طور پر معطل کیا گیا تھا۔ عمراکمل کواینٹی کرپشن کوڈکےتحت معطل کیاگیا تھا اورانکوائری مکمل ہونے تک وہ کسی طرح کی کرکٹ میں حصہ نہیں لےسکتے۔
