برازیلیا: برازیل میں جلدی بیماری میں مبتلا ہوکر پورا گھر ایک ہی طرح سے متاثر ہوگیا تاہم ان کی بیماری گھر کے ایک بچے کے لیے ماڈلنگ کنٹریکٹ کی وجہ بن گئی۔
غیرملکی خبررساں ادارے کی رپورٹ کے مطابق برازیل کے علاقے باہیا سے تعلق رکھنے والے 7 سالہ سیمیول سلوا بین الاقوامی سطح پر ماڈلنگ کررہے ہیں، بچے کے چہرے پر پیدائشی طور پر سفید دھبے ہیں جو ان کے ماتھے پر موجود ہیں جبکہ اسی وجہ سے بال بھی اس طرح سفید ہیں جو ایک ڈیزائن کی شکل اختیار کرگئے ہیں۔
رپورٹ کے مطابق بچے کے اہلخانہ بھی اسی بیماری کا شکار ہیں اور ان کے چہروں پر بھی ایسے ہی نشانات ہیں جیسے بچے کے چہرے پر ہیں۔
بیماری کی وجہ سے اس خاندان کے اکثر لوگ ان نشانات کو چھپانے کے لیے زیادہ تر گنجے رہا کرتے تھے تاہم بعد میں انہوں نے ان نشانات کے ساتھ رہنے کا فیصلہ کیا۔
بیماری میں مبتلا اس خاندان نے اپنا ایک انسٹاگرام اکاؤنٹ بنایا اور وہاں اپنی تصاویر شیئر کیں تو خلاف توقع انہیں ماڈلنگ کا کنٹریکٹ مل گیا۔
رپورٹ کے مطابق 7 سالہ سیمویل اب تک جونیئر اسٹائل لندن، بازار گڈز، ڈیگزی میگزین کے سرورق پر نمودار ہوچکے ہیں۔
اس کے ساتھ ساتھ سیمویل ٹورنٹو فیشن ویک، پیرس فیشن ویک اور لندن کڈز فیشن ویک جیسے بڑے ایونٹس میں بھی ماڈلنگ کرچکے ہیں۔
