کراچی: گلشن اقبال میں پی ٹی آئی تقریب میں بد نظمی ہو گئی، کارکنوں کے درمیان ایک دوسرے پر کرسیاں چل گئیں، بد نظمی پر پارٹی کے چیف آرگنائزر نے سخت نوٹس لے لیا۔
تفصیلات کے مطابق کراچی کے علاقے گلشن اقبال میں پی ٹی آئی تقریب میں شدید بد نظمی ہو گئی، کارکن ایک دوسرے پر کرسیاں پھینکتے رہے، اور خرم شیر زمان، حلیم عادل شیخ، اشرف جبار قریشی کے خلاف نعرے بازی کی۔
کراچی میں پی ٹی آئی تقریب میں بد نظمی پر پارٹی کے چیف آرگنائزر نے سخت نوٹس لے لیا، ترجمان پی ٹی آئی عمر سرفراز چیمہ نے کہا کہ واقعے کی تحقیقات اور ذمہ داران کے تعین کی ہدایت کر دی گئی ہے۔
یہ بھی پڑھیں: میں اچھی تقریر کرنے والا نہیں پرویز خٹک، جلسے میں بد نظمی، کارکنوں کا احتجاج
ترجمان پی ٹی آئی کا کہنا تھا کہ واقعے کے تصویری اور ویڈیو شواہد اکٹھے کیے جا رہے ہیں، بد نظمی میں ملوث افراد سے کوئی نرمی نہیں برتی جائے گی۔
عمر سرفراز چیمہ نے کہا کہ شر پسند عناصر کے خلاف سخت کارروائی عمل میں لائی جائے گی، کارکنان ملوث ہوئے تو سخت انضباطی کارروائی کا سامنا کرنا ہوگا۔
واضح رہے کہ ادھر خیبر پختون خوا کے ضلع خیبر میں بھی پرویز خٹک کے جلسے میں بد نظمی اور دھکم پیل ہوئی، پرانے کارکنوں کو نظر انداز کرنے پر کھلاڑیوں نے احتجاج کیا، اسٹیج پر چڑھنے والوں کو نیچے دھکیل دیا گیا۔
