اسلام آباد : وزیراعظم شہباز شریف کے معاون خصوصی برائے احتساب عرفان قادر نے کہا ہے کہ کسی بھی ممبر کی5سال سے زائد نااہلی نہیں ہوگی، نوازشریف اور جہانگیر ترین سمیت دیگر بھی اس قانون سے فائدہ اٹھاسکیں گے۔
اس حوالے سے اے آر وائی نیوز کے پروگرام اعتراض ہے میں معاون خصوصی عرفان قادر نے کہا کہ پارلیمان ایک قانون ساز ادارہ ہے اور اس میں واضح قانون سازی کردی گئی ہے۔ انہوں نے کہا کہ آئین کے آرٹیکل62،63میں مکمل ترامیم کی بھی ضرورت ہے۔
معاون خصوصی نے کہا کہ آئین کے مطابق پارلیمان نے قانون بنا دیا ہے کہ کسی بھی ممبر کی5سال سے زائد نااہلی نہیں ہوگی، نوازشریف اور جہانگیر ترین سمیت دیگر بھی اس قانون سے فائدہ اٹھاسکیں گے۔
عرفان قادر کا کہنا تھا کہ نوازشریف،جہانگیرترین ویسے بھی اپنی 5سال کی مدت پوری کرچکے ہیں، البتہ نواز شریف کے راستے میں ابھی پاناما کیس اٹکا ہوا ہےجس پر اپیل کردی گئی ہے، اپیل میں نیا وکیل بھی کیا جاسکتا ہے اور نیاب ینچ بھی کیس سن سکتا ہے، گزشتہ12،13سال میں جو غلط فیصلے ہوئے نئےقانون سے ان کی داد رسی ہوگی۔
ایک سوال کے جواب میں انہوں نے کہا کہ آئین کے مطابق اسمبلی اپنی مدت پوری کرنے کے بعد ازخود تحلیل ہوتی ہے تو60دن میں الیکشن کرانا ہوں گے اور اگر ایک دن قبل بھی اسمبلیاں توڑ دی جائیں تو آئین کے مطابق 90دن میں الیکشن کرانا ہوں گے، اب الیکشن کرانا اور ا سکی تاریخ کا تعین الیکشن کمیشن کی ذمہ داری ہے صدر پاکستان کی نہیں۔
واضح رہے کہ سینیٹ نے پی ٹی آئی اور جماعت اسلامی کی مخالفت اور شدید احتجاج کے باوجود الیکشن کمیشن کو صدر سے مشاورت کیے بغیر یکطرفہ طور پر انتخابات کی تاریخوں کے اعلان کا اختیار دے دیا ہے۔
اس کے علاوہ منظور کیے جانے والے بل کے ذریعے تاحیات نااہلی کا باب بھی بند کردیا گیا ہے جس کے تحت متعلقہ شخص مدت کی تکمیل کے بعد قومی یا صوبائی اسمبلی کا رکن بننے کا اہل ہوگا۔
