ابو ظہبی: متحدہ عرب امارات میں گزشتہ برس طلاق کے اعداد و شمار جاری کیے گئے ہیں، ایک جوڑے کے درمیان شادی کے صرف 12 دن بعد طلاق ہوگئی۔
اردو نیوز کے مطابق متحدہ عرب امارات کی وزارت انصاف نے مملکت میں مقیم غیر ملکی اور مقامی جوڑوں کے درمیان طلاق کے اعداد و شمار جاری کیے ہیں۔
وزارت کا کہنا ہے کہ شارجہ، عجمان، ام القوین اور الفجیرہ کی وفاقی عدالتوں کے ریکارڈ کے مطابق گزشتہ سال ایک غیر ملکی جوڑے کی شادی کو ابھی 12 دن بھی نہ گزرے تھے کہ ان میں طلاق ہوگئی، یہ سب سے جلدی طلاق کا پہلا واقعہ ہے۔
وزارت انصاف کا کہنا ہے کہ سنہ 2021 کے دوران یہاں مقیم غیر ملکیوں میں طلاق کے 194 واقعات ریکارڈ پر آئے جبکہ 2022 کے دوران ان کی تعداد کم ہو کر 176 ہو گئی۔
وزارت انصاف کے مطابق ایک غیر ملکی جوڑے کی طلاق شادی کے 13 دن بعد، ایک اور جوڑے کی طلاق 14 دن، ایک کی 16 دن، ایک کی 17 دن اور ایک جوڑے میں طلاق شادی کے 25 دن بعد ہوئی۔
ایک اور مقامی جوڑے نے 36 سال تک شادی کے بندھن میں رہنے کے بعد علیحدگی کا فیصلہ کیا۔
